Նախընտրական քարոզարշավի շրջանակներում Գողթ բնակավայրի բնակիչների հետ հանդիպման ընթացքում վարչապետ Նիկոլ Փաշինյանն անդրադարձել է ԱՄՆ պետքարտուղար Մարկո Ռուբիոյի՝ Հայաստան կատարած այցին և նշել, որ մայիսի 26-ին Երևանում նախաստորագրվել է «TRIPP» նախագծի իրականացման շրջանակային համաձայնագիրը։
«Միացյալ Նահանգների պետքարտուղար Մարկո Ռուբիոն ժամանեց Հայաստան և արտաքին գործերի նախարարի հետ նախաստորագրեցին TRIPP նախագծի իրագործման շրջանակային համաձայնագիրը։ Առավելագույնը մեկ ամսվա ընթացքում այն վերջնական կստորագրվի»,- ասել է Փաշինյանը։
Նրա խոսքով՝ նախագծի ամենաակնհայտ բաղադրիչներից մեկը Մեղրիի երկաթուղու վերաբացումն է։
«Մեղրիի երկաթուղին վերաբացվելու է, և այդ երկաթուղուց օգտվելու է ինչպես Ադրբեջանը՝ Նախիջևանի և Ադրբեջանի հիմնական մասի միջև կապի համար, այնպես էլ Հայաստանը՝ երկրի հյուսիսային և հարավային հատվածների միջև երկաթուղային կապ ստեղծելու նպատակով։ Մենք այսօր հարավից դեպի հյուսիս, այսինքն՝ Սյունիքի հատվածում երկաթուղի չունենք, և մենք ստանալու ենք այդ երկաթուղին»,- նշել է վարչապետը։
Նա հավելել է, որ երկաթուղու վերագործարկումը կարևոր նշանակություն կունենա նաև բեռնափոխադրումների համար, մասնավորապես Զանգեզուրի պղնձամոլիբդենային կոմբինատի արտադրանքի տեղափոխման առումով։
«Սա նշանակում է մեզ համար հնարավորություն, որ մենք Սյունիքից առնվազն խտանյութը բերենք միանգամից երկաթուղով և դեպի Սյունիք էլ ապրանքներ տանենք»,- ասել է Փաշինյանը։
Նրա խոսքով՝ Հայաստանը նաև տրանզիտային եկամուտներ է ստանալու։
«Ամեն գնացք, որ մեր տարածքով անցավ, դրա համար վճարելու են, այդ գումարները գալու են Հայաստանի Հանրապետության պետական բյուջե»,- նշել է վարչապետը։
Փաշինյանի խոսքով՝ այդ միջոցները կարող են ուղղվել ճանապարհաշինությանը, սոցիալական ծրագրերին և այլ պետական կարիքների։ Նա ընդգծել է նաև, որ երկաթուղային փոխադրումների ավելացումը կարող է նվազեցնել ծանրաբեռնված բեռնատարների ազդեցությունը ճանապարհների վրա։ Բացի երկաթուղուց, ըստ նրա, TRIPP նախագիծը նախատեսում է նաև գազամուղների, նավթամուղների, էլեկտրահաղորդման գծերի և ինտերնետային մալուխների անցկացում Հայաստանի տարածքով։
«Այդ ամեն ինչի համար Հայաստանը ստանալու է տրանզիտի փող»,- ասել է նա։
Վարչապետի խոսքով՝ այդ ենթակառուցվածքները հնարավորություն կտան Հայաստանին ինչպես ներմուծումներ, այնպես էլ արտահանումներ իրականացնել։
Փաշինյանը նշել է նաև, որ ծրագրի իրականացումը ենթադրում է մեծ ներդրումներ և նոր աշխատատեղերի ստեղծում։ Նրա խոսքով՝ նախագծի շրջանակում Հայաստանը նաև երկաթուղային կապ կստանա Իրանի հետ։ Արդյունքում Հայաստանը կարող է դառնալ հյուսիս-հարավ և արևելք-արևմուտք տրանսպորտային խաչմերուկ։
«Մենք նաև արտահանման և ներկրման համար Պարսից ծոցի և Սև ծովի միջև ստանում ենք երկաթուղային կապ»,- ասել է Փաշինյանը։