Հարավային Լիբանանի 34 գյուղերի բնակիչները Իսրայելի բանակից նախազգուշացում են ստացել այնտեղ գտնվող շիաների «Հեզբոլլահ» կազմակերպության թիրախների վրա առաջիկա օդային հարվածների մասին, հայտնում է ՏԱՍՍ-ը։
Իսրայելի բանակի խոսնակ Ավիխայ Էդրին X-ում արաբերենով տարածված հայտարարության մեջ պահանջել է, որ լիբանանցիները լքեն վտանգավոր գոտին:
«Շիա զինյալների, նրանց օբյեկտների կամ ռազմական տեխնիկայի մոտակայքում գտնվող յուրաքանչյուր ոք լուրջ վտանգի է ենթարկում իր կյանքը։ Անվտանգության նկատառումներից ելնելով՝ դուք պետք է անհապաղ լքեք գյուղերը և տեղափոխվեք առնվազն 1000 մետր հեռավորության վրա» – ասվում է հայտարարության մեջ։
Մայիսի 21 տվյալներով՝ Լիբանանում Իսրայելի հարձակումների հետևանքով զոհերի թիվը հասել է 3089-ի։ Իսրայելի և «Հեզբոլլահ»-ի միջև հակամարտությունը սրվել էր փետրվարի վերջին Իրանի դեմ ԱՄՆ-Իսրայել համատեղ ռազմական գործողության մեկնարկից հետո։ Մայիսի 15-ին Վաշինգտոնը հայտարարել էր, որ Իսրայելի և Լիբանանի միջև հրադադարը կերկարաձգվի ևս 45 օրով։
