Ի՞նչ են հայտարարագրել «Բարգավաճ Հայաստան» կուսակցության թեկնածուները

«Բարգավաճ Հայաստան» կուսակցության պատգամավորի 104 թեկնածուներն ընդհանուր ավելի քան 17 մլրդ դրամին համարժեք դրամական միջոցներ են հայտարարագրել, դրանից 15․2 մլրդ դրամը ԲՀԿ առաջնորդ Գագիկ Ծառուկյանինն է։ Թեկնածուների 40%-ը գործազուրկ է, 29-ը որևէ եկամուտ չի հայտարարագրել, 18 թեկնածու նշել է, որ դրամական միջոց չունի, 3-ն էլ դատարկ հայտարարագիր է ներկայացրել Կենտրոնական ընտրական հանձնաժողով։

«Հետքն» ուսումնասիրել է «Բարգավաճ Հայաստան» կուսակցության 104 թեկնածուների հայտարարագրերը։

ԲՀԿ ցուցակը գլխավորում է կուսակցության նախագահ, գործարար Գագիկ Ծառուկյանը։ Նա առաջադրված 19 ուժերի առաջին համարների շարքում ամենաշատ դրամական միջոցներն ու եկամուտն է հայտարարագրել՝ Կենտրոնական ընտրական հանձնաժողով ներկայացնելով 11 էջանոց հայտարարագիր։ 

ԱԺ նախկին պատգամավորը 43 միավոր շարժական ու անշարժ գույք ունի։ Նա հայտարարագրել է Կոտայքի մարզում գտնվող 13 հողամաս՝ ընդհանուր 61.388 քմ մակերեսով, անհատական բնակելի տուն՝ 5234 քմ մակերեսով, 7 շենք–շինություն` ընդհանուր 8189 քմ մակերեսով և հողին ամրակցված 2 այլ գույք՝ 8169 և 329.8 քմ մակերեսներով և Երևանի Կենտրոն վարչական շրջանում գտնվող 131.4 քմ մակերեսով բնակարան։

Ծառուկյանը տարբեր մակնիշի 19 ավտոմեքենա ունի՝ 2004-2023 թվականների արտադրության։

Գործարարը 45 միավոր թանկարժեք գույք է հայտարարագրել՝ ադամանդե ու ոսկյա մատանիներ, ջահեր, վարագույրներ, կահույք և այլն։ Ընդհանուր առմամբ, Ծառուկյանն ունի 6 մլն 466 հազար եվրո և 7 մլն 313 հազար դոլար արժեքով թանկարժեք գույք։

Հաշվետու ժամանակահատվածում ԲՀԿ առաջնորդը որդուց՝ Նվեր Ծառուկյանից, ստացել է 1 մլրդ 367 մլն դրամի նվիրատվություն, «Արարատցեմենտ» ՓԲԸ-ից՝ 4 մլրդ 180 մլն դրամ շահաբաժին և 950 մլն փոխառություն, «Օլիմպավան» ՍՊԸ-ից՝ 174 մլն դրամ փոխառություն, «Մուլտի ուելնես կենտրոն» ՍՊԸ-ից՝ 292 մլն դրամ շահաբաժին և 61.7 մլն դրամ փոխառություն, «Ֆիրմա նյու» ՍՊԸ-ից՝ 865 մլն դրամ փոխառություն, բաժնեմասերի օտարումից՝ 1.8 մլն եվրո, «Գլոբալ մոթորս» ՍՊԸ-ից՝ 5.4 մլն դրամ վարձավճար, «Զվարթնոց հենդլինգ» ՓԲԸ-ից՝ 1 մլրդ 520 մլն դրամ շահաբաժին, «Մուլտի մոթորս» ՍՊԸ-ից՝ 2.7 մլն դրամ վարձավճար, «Մուլտի սիս» ՍՊԸ-ից՝ 3.5 մլն դրամ շահաբաժին, «Ֆայն քարս» ՍՊԸ-ից՝ 15.2 մլն դրամ շահաբաժին և «Կոնվերս բանկ»-ից՝ 25.000 դրամ բանկային տոկոս։

Գագիկ Ծառուկյանի դրամական միջոցները կազմել են 3 մլրդ 450 մլն դրամ, 26.7 մլն դոլար, 5.4 մլն եվրո և 2.3 մլն ռուբլի։

ԲՀԿ ղեկավարը 56 ընկերությունում 20-ից մինչև 100% մասնաբաժին ունի։

Ցուցակում երկրորդը «Մայր Հայաստան» կուսակցության նախագահ, ԱԺ նախկին պատգամավոր Անդրանիկ Թևանյանն է։ Նա Երևանի կենտրոնում գտնվող 143․6 քմ մակերեսով բնակարան և 21 քմ մակերեսով ավտոտնակ է հայտարարագրել, 525 քմ մակերեսով մեկ հողամաս էլ ունի Կոտայքի մարզի Նուռնուս գյուղում։ 

Թևանյանը հայտարարագրել է նաև 2018 թվականի արտադրության Honda CR-V ավտոմեքենա։

2025 թվականի ապրիլի 1-ից 2026 թվականի ապրիլի 1-ը թեկնածուն, ըստ հայտարարագրի, 4․9 մլն դրամ եկամուտ է ստացել «Թևանյան» ՍՊԸ-ից՝ որպես վերադարձված փոխառություն։ Հիմնադրումից՝ 2008 թվականից մինչև 2021-ի հուլիս Անդրանիկ Թևանյանն այս ընկերության 100% սեփականատերն ու տնօրենն էր, այժմ ընկերությունը ղեկավարում է կինը՝ Էլմիրա Թևանյանը։ «Թևանյան» ՍՊԸ-ին է պատկանում 7or.am լրատվական կայքը։

Հայտարարագիր ներկայացնելու պահին Անդրանիկ Թևանյանն ունեցել է 98.3 մլն դրամին համարժեք գումար՝ 12․3 մլն դրամ, 110 հազար դոլար և 107 հազար եվրո։

Նախկին պատգամավոր Լուիզա Սարգսյանը «Բարգավաճ Հայաստան» կուսակցության ցուցակի 3-րդ համարն է։ Նա Երևանում գտնվող համատեղ սեփականության իրավունքով երկու բնակարան է հայտարարագրել՝ 98 և 80 քմ մակերեսներով։ Սարգսյանը շուրջ 2 մլն դրամ եկամուտ է ստացել Հայաստանի ազգային պոլիտեխնիկական համալսարանից, որտեղ Ռուսաց լեզվի ամբիոնի վարիչի ժամանակավոր պաշտոնակատարն է։ Նա հայտարարագրման պահին, ըստ ԿԸՀ ներկայացրած փաստաթղթի, 2 մլն դրամ է ունեցել։

Հաջորդը ցուցակում Հայաստանի արտաքին գործերի նախկին նախարար (2020-2021) Արա Այվազյանն է: Նա 84․3 քմ մակերեսով բնակարան ունի Երևանում՝ համատեղ սեփականության իրավունքով։ ԲՀԿ-ի 4-րդ համարը 2025 թվականի արտադրության BYD Yuan Up մեքենա է հայտարարագրել և հաշվետու ժամանակահատվածում ստացած 569 հազար դրամ աշխատավարձ Երևանի պետական համալսարանից։ Ըստ հայտարարագրի՝ նախկին պաշտոնյան ունի 1 մլն դրամ, 20 հազար դոլար և 1501 եվրո։

Կուսակցության ցուցակի 5-րդ համարը Հայաստանի պետական տնտեսագիտական համալսարանի (ՀՊՏՀ) դասախոս Արմեն Մանուկյանն է։ Նա Գեղարքունիքի մարզում գտնվող 113 քմ մակերեսով մեկ տուն է հայտարարագրել՝ համատեղ սեփականության իրավունքով, և 96․9 քմ մակերեսով բնակարան Երևանում։ Որպես անշարժ գույք Մանուկյանը հայտարարագրել է 10 հազար քմ մակերեսով բազմամյա տնկի, որը նույնպես Գեղարքունիքի մարզում է գտնվում։ Ըստ հայտարարագրի՝ թեկնածուն ունի 3 ավտոմեքենա՝ 2020 թվականի արտադրության Lexus NX, 2019 թվականի արտադրության Toyota Camry և 2017 թվականի արտադրության Mazda 6։ Հաշվետու ժամանակահատվածում Արմեն Մանուկյանը 3 մլն դրամ աշխատավարձ է ստացել «Բարգավաճ Հայաստան» կուսակցությունից, 1․2 մլն դրամ՝ ՀՊՏՀ-ից, նույնքան՝ «Անուշ Քնար» ՍՊԸ-ից։ 12․8 մլն դրամ էլ Մանուկյանը ստացել է գյուղատնտեսական գործունեությունից։ Հայտարարագիր լրացնելու պահին նա ունեցել է 52․5 մլն դրամ, 50 հազար դոլար և 49 հազար եվրո։

Պատմության ուսուցչուհի, Աբովյանի թիվ մեկ դպրոցի նախկին տնօրեն Մետաքսյա Բաբայանը ԲՀԿ-ի ցուցակում 6-րդն է։ Նա համատեղ սեփականության իրավունքով իրեն պատկանող մեկ բնակարան է հայտարարագրել, որն Աբովյան քաղաքում է գտնվում։ Բաբայանը մեկ տարում 4․2 մլն դրամ աշխատավարձ է ստացել ԿԳՄՍ նախարարությունից, իսկ հայտարարագրման պահին ունեցել է 2․4 մլն դրամ և 5 հազար դոլար։

Հաջորդը Ազգային ժողովի «Պատիվ ունեմ» խմբակցության անդամ Մարտուն Գրիգորյանն է։ Նա Երևանում գտնվող երկու բնակարան (նույն շենքում, յուրաքանչյուրը՝ 53 քմ մակերեսով) և մեկ ավտոկայանատեղի է հայտարարագրել։ Գրիգորյանը 534 քմ մակերեսով բնակելի տուն ու երկու հողամաս (655 քմ և 1038 քմ մակերեսով) ունի Գյումրիում։ Պատգամավորը շուրջ 12 մլն դրամ աշխատավարձ է ստացել Ազգային ժողովից, հայտարարագրել է 196․4 մլն դրամ և 20 հազար դոլար։

«Դեմոկրատական այլընտրանք» կուսակցության նախագահ Սուրիկ Սուրենյանցը, որը ԲՀԿ-ի 8-րդ համարն է, միայն 2 մլն դրամ գումար է հայտարարագրել։

9-րդը ցուցակում Ազգային ժողովի «Հայաստան» խմբակցության պատգամավոր Էլինար Վարդանյանն է։ Նա Երևանում գտնվող 4 բնակարան է հայտարարագրել՝ մեկը միանձնյա, երեքը՝ համատեղ սեփականության իրավունքով։ Վարդանյանը երկու մեքենա է հայտարարագրել՝ 2024 թվականի արտադրության MERCEDES-BENZ EQA և 2013 թվականի արտադրության HONDA CR-V՝ համատեղ սեփականության իրավունքով։ Պատգամավորը 13․5 մլն դրամ աշխատավարձ է ստացել Ազգային ժողովից, 138․5 հազար դրամ՝ Հյուսիսային համալսարանից։ 2․1 մլն դրամ թեկնածուն ստացել է որպես եկամտահարկի վերադարձ, 4․5 մլն դրամ՝ վարկ։ Հայտարարագիր լրացնելու պահին, ըստ փաստաթղթի, ունեցել է 21 հազար դոլար և 725 հազար դրամ։

Առաջին տասնյակը եզրափակում է «Այլընտրանքային նախագծեր» խմբի համահիմնադիր Վահե Հովհաննիսյանը։ Նա 109․3 քմ մակերեսով բնակարան և ավտոկայանատեղի ունի Երևանում և 121.8 քմ մակերեսով այգետնակ Ձորաղբյուրում (համատեղ)։ Հովհաննիսյանը 509 հազար դրամ աշխատավարձ է ստացել «Առաջարկ Հայաստանին» հասարակական կազմակերպությունից, ևս 1207 դոլար՝ բանկային ավանդից։ Թեկնածուն հայտարարագրել է 48 մլն դրամին համարժեք դրամական միջոցներ, այդ թվում՝ 12 մլն դրամ, 58 հազար դոլար և 3 մլն ռուբլի։

Ծառուկյանից հետո ամենաշատ եկամուտները, գույքը, դրամական միջոցները․ ով ինչպես է առանձնանում

«Բարգավաճ Հայաստան»  կուսակցության նախընտրական ցուցակում ընդգրկված 104 թեկնածուներից 74-ը ԲՀԿ անդամներ են, 19-ը՝ անկուսակցական, 9-ը՝ «Մայր Հայաստան» կուսակցության, իսկ 2-ը՝ «Դեմոկրատական այլընտրանք» կուսակցության անդամներ։

Ցուցակում 36 կին և 68 տղամարդ կա։

Թեկնածուների միջին տարիքը 45-ն է։

104 թեկնածուներից 42-ը, ըստ ԿԸՀ-ում ներկայացված տվյալների, չի աշխատում։ Ստացվում է՝ 40%-ը գործազուրկ է։ 

«Բարգավաճ Հայաստան» կուսակցության առաջնորդ Գագիկ Ծառուկյանը ամենաշատ եկամուտները, դրամական միջոցներն ու գույքն է հայտարարագրել: Կուսակցության պատգամավորի 104 թեկնածուներն ընդհանուր 11 մլրդ 574 մլն դրամ եկամուտ են հայտարարագրել 1 տարվա համար, դրանից 11 մլրդ 224 մլն դրամը ստացել է Գագիկ Ծառուկյանը։ 2025 թվականի ապրիլի 1-ից 2026 թվականի ապրիլի 1-ը կուսակցության ցուցակում ԲՀԿ առաջնորդից հետո ամենաշատ եկամուտը, ըստ հայտարարագրի, ունեցել է «Մուլտի Ուելնես» ՍՊԸ տնօրեն Արման Փիրոյանը։ Նա 32․8 մլն դրամ աշխատավարձ է ստացել «Մուլտի Ուելնես»-ից և 13 մլն դրամ՝ «Արման Փիրոյան» ԱՁ-ից։ Չնայած 45․8 մլն դրամ եկամտին՝ Փիրոյանն ընդամենը 500 հազար դրամ է հայտարարագրել։ Նա ցուցակում 17-րդն է։

Եկամտի չափով երրորդ տեղում 97-րդ համար Կոլյա Հախումյանն է։ Նա 24 մլն դրամ է ստացել ձեռնարկատիրական գործունեությունից։

ԲՀԿ ցուցակում, ըստ հայտարարագրի, 4 թեկնածու 100 մլն դրամից ավել գումար ունի։ Հայտարարագրված դրամական միջոցների չափով Գագիկ Ծառուկյանին հաջորդում է «Սայթ Մեդիա» ՍՊԸ փոխտնօրեն Երվանդ Բոզոյանը։ Նա հայտարարագրել է 91․2 մլն դրամ, 350 հազար դոլար և 75 հազար եվրո։ Բոզոյանը ցուցակում 22-րդն է։

203․7 մլն դրամին համարժեք դրամական միջոցներով երրորդը պատգամավոր Մարտուն Գրիգորյանն է։

112․5 մլն դրամին համարժեք գումար էլ հայտարարագրել է ցուցակի 41-րդ համար Սարգիս Սարգսյանը։ Նա ունի 85 մլն դրամ և 75 հազար դոլար։ Ըստ հայտարարագրի՝ նա հիմա չի աշխատում։

Սարգիս Սարգսյանը նաև ամենաշատ շարժական ու անշարժ գույքն է հայտարարագրել Ծառուկյանից հետո՝ 19 միավոր։ Նա միանձնյա սեփականության իրավունքով 13 հողամաս ունի Կոտայքի մարզում, Երևանում կառուցվող 2 բնակարանի (132.3 և 83.4 քմ մակերեսով) և 1 ավտոկայանատեղիի գնման իրավունք, 1998 և 2000 թթ․ արտադրության երկու Opel Astra և 2019 թվականի արտադրության EFUN PUSA մոտոցիկլ։

Երվանդ Բոզոյանն էլ հայտարարագրած 13 գույքով 3-րդն է։ Նա Երևանում գտնվող միանձնյա սեփականության իրավունքով երկու բնակարան և երկու ավտոտնակ է հայտարարագրել, մեկ բնակարան էլ ունի Վրաստանի մայրաքաղաք Թբիլիսիում։ Թեկնածուն հայտարարագրում նշել է նաև միանձնյա սեփականության իրավունքով իրեն պատկանող 5 հողամասի մասին, բոլորը՝ Արմավիրի մարզում։ Բոզոյանը 3 ավտոմեքենա ունի՝ 2015 թվականի արտադրության Hyundai Elantra, 2004 թվականի Volkswagen Jetta և 1999 թվականի Mercedes-Benz E200:

«Հետքը» առաջիկայում կներկայացնի մյուս ուժերի նախընտրական ցուցակներում ընդգրկված թեկնածուների հայտարարագրերից հետաքրքիր մանրամասներ։

Տե՛ս նաև․

Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter