Միջազգային հանրապետական ինստիտուտի՝ International Republican Institute (IRI) հարցման համաձայն՝ Հայաստանի քաղաքացիների ընկալմամբ կառավարության վերջին վեց ամիսների հիմնական ձախողումը արտաքին քաղաքականությունն ու դիվանագիտությունն է։
Հարցվածների 6 տոկոսը որպես գլխավոր խնդիր նշել է «սխալ արտաքին քաղաքականություն և դիվանագիտություն», 4 տոկոսը՝ կառավարության կադրային քաղաքականությունն ու ընդհանուր վատ աշխատանքը, սահմանային անվտանգության բացակայությունը, 3-ական տոկոս՝ գնաճն ու արտաքին պարտքի աճը, դատական համակարգի վատ աշխատանքը և Ռուսաստանի հետ հարաբերությունների լարվածությունը։
2-ական տոկոս են ստացել մի շարք խնդիրներ, այդ թվում՝ կրթության ցածր որակը, տարածքային ամբողջականության պահպանման խնդիրները, ճանապարհաշինության վատ որակը և իշխանությունների ճնշումը հոգևորականների նկատմամբ, ինչպես նաև հանրային տրանսպորտի ցածր որակը։
1-ական տոկոսով նշվել են բանակի թուլացումը և կոռուպցիայի դեմ պայքարի անարդյունավետությունը և մի շարք սոցիալական և ինստիտուցիոնալ խնդիրներ, այդ թվում՝ Բաքվում պահվող գերիների հարցը, գյուղատնտեսական խնդիրները, հասարակության բաժանված լինելը, ցածր թոշակները, համընդհանուր առողջապահական ապահովագրության ստեղծումը, խաղաղության համաձայնագրի ստորագրումը, եկեղեցու բարեփոխումների դանդաղ ընթացքը, քաղաքական բանտարկյալների առկայությունը , Ադրբեջանի հետ հարաբերությունների զարգացումը և այլ հարցեր։
Հարցվածների 11 տոկոսը նշել է «այլ» պատասխաններ, 21 տոկոսը՝ որ որևէ ձախողում չի տեսնում, իսկ 40 տոկոսը դժվարացել է պատասխանել։
