ՌԴ փոխարտգործնախարար Միխայիլ Գալուզինն հերքել է հայկական որոշ լրատվամիջոցներում տարածված տեղեկությունները, թե Հայաստանում ռուս դիվանագիտական ներկայացուցչությունը և դրա աշխատակիցները զբաղվում են երկրի շահերի դեմ ուղղված գործողություններով։
Գալուզինի խոսքով՝ նման հրապարակումները «բացարձակապես իրականությանը չեն համապատասխանում» և հանդիսանում են զրպարտություն, որը նպաստում է Ռուսաստանի դեմ «լրտեսական մոլուցքի» տարածմանը։
Նա ընդգծել է, որ ռուսական դիվանագիտական առաքելության գործունեությունը լիովին համապատասխանում է 1961 թվականի Վիեննայի կոնվենցիային և իրականացվում է ընդունված միջազգային նորմերի շրջանակում։
Փոխարտգործնախարարը նաև նշել է, որ որոշ հրապարակումներում հայ քաղաքական գործիչներին վերագրվում են փաստեր, որոնք «երբեք չեն եղել իրականում»։ Որպես օրինակ՝ նա նշել է Նարեկ Կարապետյանի վերաբերյալ շրջանառվող տեղեկությունները՝ պնդելով, որ նա երբեք Ռուսաստանի քաղաքացիություն չի ունեցել։
Գալուզինը շեշտել է, որ Մոսկվան շարունակելու է արձագանքել նման հայտարարություններին։
ՌԴ փոխարտգործնախարարը նաև ընդգծել է, որ Հայաստանի՝ միաժամանակ Եվրամիության և ԵԱՏՄ անդամ դառնալը գործնականում անհնար է՝ այն համեմատելով «երկու հարսանիքի միջև պարելու» հետ։
Նրա խոսքով՝ ԵՄ անդամակցության վերաբերյալ քննարկումները հաճախ ունեն պոպուլիստական բնույթ և նման գործընթացներ նախկինում կիրառվել են նաև այլ երկրներում։
«Հայաստանին ԵՄ-ին ներգրավելը պոպուլիստական կարգախոս է. նույն մարտավարությունը կիրառվել է Ուկրաինայի և Մոլդովայի դեմ»,- ասել է նա։
Գալուզինը նշել է, որ Ռուսաստանը շարունակում է հայ ժողովրդին դիտարկել որպես «եղբայրական ժողովուրդ», սակայն միաժամանակ չի կարող ընդունել Երևանի դիրքորոշումները ԵԱՏՄ-ին անդամակցության հարցում։
Նա նաև հայտարարել է, որ ԵՄ ներկայացուցիչների ներկայությունը Հայաստանում, ըստ Մոսկվայի, որոշ դեպքերում կարող է դիտարկվել որպես ներքին գործերին միջամտություն։