Առողջապահության համաշխարհային կազմակերպությունը (ԱՀԿ) ահազանգում է՝ Էբոլայի նոր շտամի դեմ պատվաստանյութի ստեղծումը կարող է տևել առնվազն կես տարի։ ԱՀԿ-ի տվյալներով՝ Կենտրոնական Աֆրիկայում տարածվող Էբոլայի բռնկումը, հավանաբար, սկսվել է դեռ ամիսներ առաջ, սակայն պաշտոնապես հայտնաբերվել է միայն մայիսի 15-ին։ Սա զգալիորեն բարդացրել է վիրուսի տարածումը վերահսկելու փորձերը։
Խոսքը վերաբերում է հազվադեպ հանդիպող Բունդիբուգիո (Bundibugyo) շտամին, որի դեմ ներկայումս ո՛չ հաստատված բուժում կա, ո՛չ էլ գրանցված պատվաստանյութ։ ԱՀԿ-ի մասնագետների խոսքով՝ ամենահեռանկարային փորձարարական պատվաստանյութը մարդկանց վրա փորձարկումների փուլ կարող է հասնել միայն 6-9 ամիս անց։
Ներկայումս Կոնգոյի Դեմոկրատական Հանրապետությունում և Ուգանդայում գրանցվել է մոտ 600 հավանական վարակման դեպք և 139 մահ։ Սակայն մասնագետները ենթադրում են, որ իրական թվերը կարող են շատ ավելի բարձր լինել։ Լոնդոնի Իմպերիալ քոլեջի (Imperial College London) և ԱՀԿ-ի գնահատմամբ՝ վարակվածների թիվն արդեն կարող է անցնել 800-ը, իսկ վատագույն սցենարի դեպքում՝ հասնել 1000-ի։