ԱՄՆ նախագահ Դոնալդ Թրամփը հայտարարել է, որ Իրանի դեմ ԱՄՆ-ի հարվածները վերսկսելու ծրագիրը դադարեցվել է երկու կամ երեք օրով, փոխանցել է «Ինտերֆաքս»-ը։
«Երկու կամ երեք օր։ Մենք խոսում ենք կարճ ժամանակահատվածի մասին»,- ասել է նա Վաշինգտոնում լրագրողներին։
Թրամփը նշել է, որ հույս ունի ի վերջո ստիպված չի լինի վերսկսել Իրանի դեմ գործողությունները։
«Եթե մենք կարողանանք լուծել սա՝ առանց ամեն ինչ ռմբակոծելու, հրաշալի կլինի»,- պարզաբանել է ԱՄՆ նախագահը։
Ավելի վաղ Թրամփը հայտարարել էր, որ պլանավորում է հարվածներ սկսել մայիսի 19-ին, բայց դադարեցրել է ծրագիրը՝ Իրանի հետ ճգնաժամի դիվանագիտական լուծման շուրջ համագործակցող մի քանի երկրների խնդրանքով։
The New York Post-ին տված հարցազրույցում ԱՄՆ նախագահը հայտարարել է, որ ներկայումս պատրաստ չէ փոխզիջման գնալ Թեհրանի հետ։ Նա բացատրել է, որ բաց չէ որևէ զիջման՝ Իրանի վերջին և անբավարար խաղաղության առաջարկը ստանալուց հետո։ «Ես հիմա պատրաստ չեմ որևէ բան ընդունել»,- ասել է Թրամփը։
