Անցած ժամվա լուրերը՝ հակիրճ և բովանդակային.
• Ալեն Սիմոնյանը հայտարարել է, որ զարմանում է Նիկոլ Փաշինյանի դիմացկունության վրա և իշխանությունների նկատմամբ ատելության մթնոլորտի մեղավոր է համարել ընդդիմությանը։ Նա նաև պնդել է, որ ընդդիմադիր ուժերը քաղաքական ծանր վիճակում են և փորձում են սադրանքներով ուշադրություն գրավել։
• Վահագն Ալեքսանյանը հրապարակմամբ քննադատել է նախկին իշխանություններին ու «ղարաբաղյան կլանին»՝ նշելով, որ դրանցից առավել շատ տուժել է հենց Ղարաբաղի ժողովուրդը։
• Գագիկ Ծառուկյանը արձագանքել է Փաշինյանի հայտարարություններին՝ ասելով, որ չի պատրաստվում պատասխանել վիրավորանքների լեզվով։ Նրա խոսքով՝ իշխանությունը չունի ծրագիր և փորձում է ամեն ինչ փոխարինել հարձակումներով։
• ԱՊՀ դիտորդական առաքելությունը այցելել է ՀՀ ԿԸՀ․ հայտնի է դարձել, որ Հայաստանի խորհրդարանական ընտրություններին ԱՊՀ-ն կուղարկի շուրջ 120 դիտորդ։
• «Երևանի ավտոբուս» ընկերությունը հերքել է դիզվառելիքի գնման գործընթացում չարաշահումների մասին մեղադրանքները՝ դրանք անվանելով զրպարտություն և նախընտրական շահարկում։
• Իլհամ Ալիևը հայտարարել է, որ Ադրբեջանը համատեղում է պատմական ժառանգությունն ու ժամանակակից զարգացումը, ինչպես նաև նշել է, որ օկուպացված Արցախում արդեն բնակվում է 85 հազար մարդ։
• Իրանի ԱԳՆ խոսնակը հայտարարել է, որ ԱՄՆ ռազմական ներկայությունը սպառնալիք է Մերձավոր Արևելքի երկրների համար և կոչ արել տարածաշրջանի պետություններին չտրվել արտաքին ազդեցություններին։