Հայաստանի Հանրապետության էկոնոմիկայի նախարարությունը հայտնում է, որ հաստատվել է 2026 թվականին կաթի արտադրության համար սուբսիդավորում տրամադրելու ծրագիրը, և արդեն սկսվել է դիմումների ընդունումը։
Կովի անմշակ կաթ արտադրող իրավաբանական կամ ֆիզիկական անձինք, ինչպես նաև անհատ ձեռնարկատերերը, աջակցություն ստանալու նպատակով պետք է դիմում ներկայացնեն համայնքի կամ բնակավայրի վարչական ղեկավարին՝ թղթային կամ էլեկտրոնային տարբերակով։
Դիմումի մեջ անհրաժեշտ է նշել բնակության վայրն ու հասցեն, հեռախոսահամարը, բանկային հաշվեհամարը, տնօրինվող կովերի քանակը և դրանց ականջապիտակների համարները։
Դիմումին կից պահանջվում է ներկայացնել անձնագրի պատճենը և «Գյուղատնտեսական ծառայությունների կենտրոն» ՊՈԱԿ-ի անասնաբույժի տրամադրած քաղվածքը գրանցամատյանից, որը կհաստատի կենդանիների մասնակցությունը պատվաստման ծրագրերին։
Սուբսիդավորման չափը յուրաքանչյուր կովի համար սահմանված է 15 հազար դրամ։ Այս աջակցությունից կարող են օգտվել 3 և ավելի գլուխ կով ունեցողները, ընդ որում՝ սուբսիդավորվող գլխաքանակի առավելագույն շեմը 20 է։