Շվեդիայի իշխանությունները հանտավիրուսի տարածման ռիսկը բնակչության շրջանում գնահատում են ցածր, ասել է ժամանակավոր պետական համաճարակաբան Էրիկ Ստորեգարդը։
«Առողջապահության համաշխարհային կազմակերպությունը և Եվրոպական հանձնաժողովը վարակի տարածման ռիսկը բնակչության շրջանում գնահատել են շատ ցածր։ Մենք կիսում ենք այս գնահատականը. ներկայումս չկա որևէ պատճառ հակառակը կարծելու», – ասել է համաճարակաբանը Շվեդիայի կառավարության YouTube ալիքով հեռարձակված մամուլի ասուլիսում։
SVT-ի տվյալներով՝ MV Hondius նավի վրա գտնվել է Շվեդիայի քաղաքացի, որը ներկայումս գտնվում է իր բնակության շրջանի հիվանդությունների վերահսկման վարչության հսկողության տակ։ Շվեդիայի հանրային առողջապահության գործակալության տվյալներով՝ տղամարդը ախտանիշներ չունի և ինքնամեկուսացել է տանը։
Մահացու հանտավիրուսի բռնկում է տեղի ունեցել հոլանդական MV Hondius զբոսանավի վրա, որը Արգենտինայից դեպի Կաբո Վերդե էր ուղևորվում։ Երեք մարդ մահացել է։ Մայիսի 10-ին ԱՀԿ-ն հաստատել է հանտավիրուսային վարակի ինը դեպք։