Աշխարհի տարբեր երկրներում փորձում են գտնել ուղևորներին, որոնք լքել էին հանտա վիրուսի բռնկում գրանցած կրուիզային լայները՝ նախքան Կաբո Վերդեի ափերին հասնելը, հայտնել է Reuters գործակալությունը:
Վարակի տարածումը կանխելու նպատակով իրականացվող այս միջոցառումներն անհրաժեշտ էին MV Hondius նավի վրա արձանագրված մահվան դեպքերից հետո։
ԱՀԿ տվյալներով՝ հանտա վիրուսի բռնկման հետևանքով նավի վրա երեք մարդ է մահացել՝ նիդերլանդացի ամուսնական զույգ և մեկ գերմանացի։ Առնվազն ութ մարդ վարակված է։ Նիդերլանդների կառավարության տեղեկություններով՝ նախքան վարակի մասին հայտնի դառնալը, շուրջ 40 ուղևոր Սանտա Էլենա նավահանգստում ցամաք է դուրս եկել։
Գործակալությունը նշում է, որ բազմաթիվ ուղևորների գտնվելու վայրը դեռևս անհայտ է։ Ներկայումս նավը, որի վրա գտնվում է 150 մարդ, ուղղություն է վերցրել դեպի Իսպանիա։
