Իսրայէլ կը ջանայ լիբանանեան կառավարութեան հետ բանակցութիւններուն համար ճշդել երկուքէն երեք շաբաթ երկարող եւ մայիսի կիսուն աւարտող պայմանաժամ մը, եւ արտօնութիւն կը խնդրէ Լիբանանի դէմ իր պատերազմի «նախնական ծրագիր»-ին վերադառնալու, եթէ բանակցութիւններուն մէջ յառաջընթաց չարձանագրուի:
Այս մասին հաղորդեց իսրայէլեան պատկերասփիւռի 12-րդ կայանը, որ կը նշէ, թէ այս առաջարկը ներկայացուած է չորեքշաբթի երեկոյեան Իսրայէլի վարչապետ Պենիամին Նեթանիահուի եւ Միացեալ Նահանգներու նախագահ Տանըլտ Թրամփի միջեւ հեռաձայնային հաղորդակցութեան ընթացքին:
Ըստ պատկերասփիւռի կայանին, Իսրայէլի կարծիքով` իր ուժերուն եւ սահմանամերձ հիւսիսային գիւղերուն դէմ «Հըզպալլայի գործողութիւններու» շարունակութիւնը կ՛ականահարէ փոխըմբռնումներու գոյացման առիթը:
Իսրայէլի քաղաքական մակարդակի կողմեր կը պնդեն, որ ներկայիս կիրարկուող «սահմանափակ հակադարձութեան» քաղաքականութիւնը կը մաշեցնէ զսպումը եւ կը վնասէ բնակիչներուն ու գործողութենական պատրաստուածութեան: