Ուկրաինայի նախագահ Վլադիմիր Զելենսկին արձագանքել է Ռուսաստանի նախագահ Վլադիմիր Պուտինի՝ մայիսի 9-ի կապակցությամբ հրադադարի առաջարկին։ Ուկրաինայի նախագահը իր Telegram ալիքում գրել է, որ հրամայել է կապ հաստատել ԱՄՆ նախագահ Դոնալդ Թրամփի թիմի հետ՝ Ռուսաստանի առաջարկի մանրամասները պարզաբանելու համար։
«Եկեք պարզենք, թե կոնկրետ ինչի մասին է խոսքը՝ Մոսկվայում շքերթի մի քանի ժամվա անվտանգության ապահովման, թե՞ ավելիի մասին», – նշել է Ուկրաինայի առաջնորդը։
Նա հայտարարել է, որ Ուկրաինան ձգտում է խաղաղության և իրականացնում է անհրաժեշտ դիվանագիտական աշխատանք՝ այս պատերազմն իրականում ավարտելու համար։
«Մենք առաջարկում ենք երկարաժամկետ հրադադար՝ ապահովելով մարդկանց հուսալի անվտանգությունը և կայուն խաղաղությունը», – ընդգծել է Զելենսկին։
Նա հավելել է, որ Ուկրաինան պատրաստ է աշխատել այս ուղղությամբ ցանկացած արժանի և արդյունավետ ձևաչափով։
Նշենք, որ, ըստ Ռուսաստանի նախագահի միջազգային հարցերով օգնական Յուրի Ուշակովի, Վլադիմիր Պուտինը պատրաստ է հրադադար հայտարարել մայիսի 9-ի շքերթից առաջ։