ԵՄ իշխանությունները Ուկրաինայից պահանջում են հարկային փոփոխությունների իրականացում, հակառակ դեպքում համայնքը կսահմանի Կիևին 90 միլիարդ եվրոյի չափով ֆինանսավորման տրամադրման ավելի խիստ պայմաններ։ Այս մասին հայտնում է ՌԻԱ Նովոստի-ն՝ հղում անելով Bloomberg գործակալությանը։
Գործակալության զրուցակիցների խոսքով՝ առաջարկը Ուկրաինային կպարտավորեցնի ներդնել 20 տոկոս ավելացված արժեքի հարկ այն ընկերությունների համար, որոնք աշխատում են արտոնյալ համակարգով և որոնց տարեկան եկամուտը գերազանցում է 4 միլիոն գրիվնան (90,7 հազար դոլար)։
«Եվրամիությունը դիտարկում է Ուկրաինային 90 միլիարդ եվրոյի վարկի տրամադրման պայմանների խստացման հնարավորությունը, ինչի արդյունքում վճարումների մի մասը կախված կլինի բիզնեսի համար ոչ հանրաճանաչ հարկային փոփոխությունների ներդրումից»,- հայտնում է գործակալությունը։
Համաձայն հրապարակման՝ Եվրահանձնաժողովում քննարկվող պլանը կարող է առնչվել այսպես կոչված մակրոֆինանսական օգնության 8,4 միլիարդ եվրոյին, որի տրամադրումն ակնկալվում է 2026 թվականին։ Աղբյուրները նշել են, որ այդ ջանքերը համընկնում են Ուկրաինայի փորձերի հետ՝ համոզելու Արժույթի միջազգային հիմնադրամին (ԱՄՀ) գոնե հետաձգել նույնանման պահանջի ներդրումը՝ ավելի քան 8 միլիարդ եվրոյի վարկային առանձին ծրագրի շրջանակներում լրացուցիչ օգնության ապասառեցման համար։
Գործակալության աղբյուրների համաձայն՝ ԱՄՀ-ն նույնպես պնդում է, որ Կիևը ձեռնարկի մի շարք միջոցներ, այդ թվում՝ մինչև հունիս ներդնի ԱԱՀ արտասահմանյան ծանրոցների համար։
Ուկրաինան վերջին մի քանի տարիներին բյուջեն ձևավորում է ռեկորդային դեֆիցիտով՝ ակնկալելով այն ծածկել արևմտյան օգնության հաշվին։ Երկրի 2026 թվականի բյուջեն ընդունվել է 1,9 տրիլիոն գրիվնա (45 միլիարդ դոլար) դեֆիցիտով։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ: