Տոկիոյի «Հանեդա» օդանավակայանում շուտով մարդկային աշխատակիցներին կարող են փոխարինել նոր՝ մարդանման ռոբոտները։ Դրանք նախատեսվում է ներգրավել ուղեբեռի և բեռների տեղափոխման աշխատանքներում՝ թեթևացնելու աշխատուժի պակասը երկրում։ Ճապոնական ավիաընկերությունը՝ Japan Airlines-ը, մայիսի սկզբից սկսում է փորձնական ծրագիր, որի շրջանակում օդանավակայանում կաշխատեն Չինաստանում արտադրված մարդանման ռոբոտներ։ Նպատակն է դրանք ապագայում դարձնել մշտական լուծում՝ հաշվի առնելով Ճապոնիայում խորացող աշխատուժի պակասը։
Ռոբոտները կաշխատեն «Հանեդա» օդանավակայանի թռիչքուղիներում՝ տեղափոխելով ուղևորների ճամպրուկներն ու բեռները։ Այս օդանավակայանը տարեկան սպասարկում է ավելի քան 60 միլիոն ուղևորի։ Ծրագրի կազմակերպիչների խոսքով՝ ռոբոտների օգտագործումը կօգնի նվազեցնել ֆիզիկական ծանրաբեռնվածությունը մարդկանց համար, սակայն անվտանգության և վերահսկման կարևոր գործառույթները դեռ կմնան մարդկանց ձեռքում։