Իսրայէլեան օդուժը երէկ բուռն յարձակումներ գործեց Նապաթիէի վրայ, ուր մեծ աւեր յառաջացաւ: Մասնաւորաբար բուռն էր Քֆարրումմանի վրայ յարձակումը: Յարձակում գործուեցաւ նաեւ Առնունի եւ Քֆարհաթթայի վրայ:
Իսրայէլեան օդուժը նաեւ Տահր Պայտարի շրջանին մէջ փոքր փոխադրակառք մը հարուածեց, այդ պատճառով ալ արձանագրուեցաւ զոհ մը, եւ դէպի Պեքա տանող ճամբան որոշ ժամանակով փակուեցաւ:
Իսրայէլեան ուժերը Հըզպալլայի հետ բուռն բախումներէ ետք նահանջեցին հարաւային Լիբանանի Տըպպին գիւղէն:
Լիբանանեան զինուորական աղբիւր մը «Հատաս»-ին յայտնեց, որ իսրայէլեան ուժերը Տըպպինէն հեռացած են արշալոյսի կանուխ ժամերուն:
Աղբիւրը նշած է, որ իսրայէլեան ուժերը վերադարձած են Խիամի մէջ գտնուող իրենց ելման կէտեր:
Իսրայէլեան բանակը Մարուահինի մէջ պայթեցուց գիւղի երկրորդական վարժարանը:
Իսրայէլեան օդուժը իրերայաջորդ յարձակումներով ամբողջութեամբ քանդեց Քասիմիէի կամուրջը: Լիբանանցի պաշտօնատար մը «Ռոյթըրզ» լրատու գործակալութեան յայտնեց. «Իսրայէլ ռմբակոծեց հարաւային Լիբանանը երկրի մնացեալ մասին կապող վերջին կամուրջը»:
Հըզպալլա յայտարարեց, թէ հարաւային Լիբանանի Ռուպ Սալասին գիւղին արեւելքը հաւաքուած իսրայէլացի զինուորներն ու իսրայէլեան մեքենաները հրթիռակոծած է, ինչպէս նաեւ հիւսիսային Իսրայէլի մէջ շարք մը բնակեցման վայրեր:
Հըզպալլա նաեւ քամիքազ անօդաչու թռչող սարքերով յարձակում գործած է Ռաս Նաքուրայի մէջ դիրքի մը վրայ:
Լիբանանցի պաշտօնատար մը «Ռոյթըրզ»-ին յայտնեց. «Կը թուի, թէ Իսրայէլ դիւանագիտական որեւէ յառաջընթացէ առաջ կը ջանայ Պընթ Ժպէյլի մէջ մարտական յաղթանակ մը արձանագրել»: