Իմ գործընկերոջ ծննդյան կապակցությամբ է եղել հեռախոսազանգը. ամենալավ և հարգալից հարաբերություններն ունեմ ՌԴ դաշնային խորհրդի ղեկավարի հետ։ Այս մասին այսօր լրագրողների հետ զրույցում հայտարարեց ԱԺ նախագահ Ալեն Սիմոնյանը՝ պատասխանելով ապրիլի 7-ին ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի հետ իր հեռախոսազրույցի մասին հարցին։
«Մենք մշտապես խոսում ենք բաց, ուղիղ՝ երկուստեք հարգանքի տրամաբանության մեջ, և հիմնական խոսակցությունը եղել է անձնական և ծննդյան կապակցությամբ։
Մի քանի օրից ես մեկնում եմ Ստամբուլ, ինքը նույնպես այնտեղ լինելու է։ Ենթադրում եմ՝ այնտեղ կշփվենք։ Խոսքը պաշտոնական հանդիպման մասին չէ»,- նշեց Սիմոնյանը։
Ըստ ԱԺ նախագահի՝ Ստամբուլում սպասվող համաժողովի շրջանակներում նախատեսված է նաև հանդիպում Ադրբեջանի և Վրաստանի իր գործընկերների հետ։
Հիշեցնենք, որ ապրիլի 7-ին, ՀՀ ԱԺ նախագահ Ալեն Սիմոնյանը հեռախոսազրույց էր ունեցել ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի հետ:
ԱԺ-ից հայտնել էին, որ քննարկվել են միջխորհրդարանական կապերին և երկկողմ օրակարգին վերաբերող հարցեր: