Ոստիկանները ձերբակալել են ավտոբուսի վարորդին ծեծի ենթարկած երեք տղամարդկանց, հայտնում է ՆԳՆ մամուլի ծառայությունը։
Ըստ գերատեսչության՝ ապրիլի 8-ին երեք տղամարդ Էրեբունի փողոցում դուրս են հանել 74 համարի ավտոբուսի վարորդին, ծեծի ենթարկել, վնասել ճակատը, ապա իջեցրել ուղևորներին և դիմել փախուստի։
Նշվում է, որ նույն օրն ավելի վաղ ավտոբուսի մեջ երկու երիտասարդ վիճել են, վարորդը նրանց դիտողություն է արել, որից հետո նրանցից մեկը մոտեցել է վարորդին, հնչեցրել վիրավորական արտահայտություններ։ Վարորդն էլ վերջինիս իջեցրել է ավտոբուսից։
Հետագայում Էրեբունի փողոցում գտնվող կանգառում «Նիսան» մակնիշի մեքենայով երեք տղամարդ փակել են ավտոբուսի ճանապարհը, բարձրացել ավտոբուս և վիճաբանել վարորդի հետ։ Նրանք դուրս են կանչել, հայհոյանքներ հնչեցրել և ձեռքերով ու ոտքերով հարվածներ հասցրել։
Ըստ հաղորդագրության՝ նախաձեռնվել է քրեական վարույթ՝ խուլիգանության հատկանիշներով։ Իրավապահները պարզել են միջադեպի մասնակիցների ինքնությունը և ձերբակալել նրանց։
