ԱՄՆ-Իրան բանակցություններում առաջ եկած տարաձայնություններն, ի թիվս այլ հարցերի, վերաբերվում են սառեցված իրանական ակտիվների վերադարձի ենթակա քանակին, հայտնել է Axios-ի լրագրող Բարաք Ռավիդը՝ հղում անելով աղբյուրին։
«Բանակցությունների վիճելի կետերից մեկը սառեցված իրանական ակտիվների ապասառեցման ենթակա քանակն էր», – գրել է Ռավիդը իր X սոցիալական ցանցի էջում։
Ամերիկացի անանուն պաշտոնյան լրագրողին ասել է, որ ԱՄՆ-ն իր «կարմիր գծերի» մեջ է դիտարկում այն պահանջները, որ Իրանը դադարեցնի ուրանի հարստացումը, ապամոնտաժի բոլոր խոշոր հարստացման օբյեկտները և հրաժարվի բարձր հարստացված ուրանի պաշարներից։
ԱՄՆ-ն նաև պահանջում է, որ Իրանն ընդունի տարածաշրջանում խաղաղության, անվտանգության և լարվածության թուլացման ավելի լայն մեխանիզմ, որը ներառում է Վաշինգտոնի տարածաշրջանային դաշնակիցներին։ Ավելին, ԱՄՆ-ն պնդում է, որ Իրանը դադարեցնի տարածաշրջանային խմբավորումների ենթադրյալ ֆինանսավորումը և լիովին բացի Հորմուզի նեղուցը առանց անցատուրքի կիրառման, գրել է լրագրողը՝ հղում անելով պաշտոնյային։
Ավելի վաղ հայտնի էր դարձել, որ ԱՄՆ-ն և Իրանը չեն կարողացել հասնել համաձայնության պատերազմի դադարեցման շուրջ Իսլամաբադում կայացած բանակցություններից հետո։
ԱՄՆ-ն և Իսրայելը հարվածներ էին հասցրել Իրանին փետրվարի 28-ին: Հարձակումների հետևանքով զոհվել էին բարձրաստիճան պաշտոնյաներ, այդ թվում՝ Գերագույն առաջնորդ Ալի Խամենեին: Թեհրանը պատասխանել էր՝ հարվածներ հասցնելով տարածաշրջանում ԱՄՆ-ի և Իսրայելի թիրախներին: Ապրիլի 8-ին ԱՄՆ-ն և Իրանը համաձայնության էին եկել երկշաբաթյա հրադադարի շուրջ, որը ներառում էր Հորմուզի նեղուցի անհապաղ բացումը:
