Ռուսաստանի արտաքին գործերի նախարարության խոսնակ Մարիա Զախարովան ճեպազրույցի ժամանակ հայտարարել է, որ Հայաստանում կան բազմաթիվ քաղաքական ուժեր, որոնք հանձնառու են Ռուսաստանի հետ կառուցողական համագործակցությանը։
Նրա խոսքով՝ երկու երկրները միավորվում են բազմազան կապերի, պատմության և ընդհանուր քաղաքակրթության լայն շրջանակով։ Ռուսաստանը 2 միլիոնանոց հայկական սփյուռքի հայրենիքն է։
«Մոսկվան չի կարող անտեսել ՀՀ-ում տեղի ունեցող գործընթացները, ինչպիսիք են Ընտրական օրենսգրքում փոփոխությունների ընդունումը։ Այս փոփոխությունները կարող են զգալի սահմանափակումներ դնել ընտրություններին մասնակցող քաղաքական ուժերի անվանումների վրա։ Կարևոր է, որ դա չարվի ընդդիմության ընտրական հնարավորությունները միտումնավոր սահմանափակելու համար։ Մենք հիշում ենք, թե ինչպես Նիկոլ Փաշինյանը վերջերս ՌԴ նախագահի հետ հանդիպման ժամանակ, խոսելով առաջիկա ընտրությունների մասին, ասաց. «Հայաստանը ժողովրդավարական երկիր է», – ասել է Զախարովան։
Նա հավելել է, որ այս քաղաքական ուժերի համար Ռուսաստանի հետ համագործակցությունը բիզնես նախագիծ չէ, այլ նրանց պատմական էության մի մասը, «հենց այն կապերը, որոնք պարզապես չեն կարող խզվել»։
Ռուսաստանի ԱԳՆ խոսնակը նաև անդրադարձել է Հայաստանի խորհրդարանի կողմից ընդունված ընտրական օրենսգրքի փոփոխություններին, որոնք արգելում են կուսակցությունների անհատական անունները։ Զախարովան ընդգծել է, որ ռուսական կողմը հարցեր ունի այս հարցի վերաբերյալ, որոնք դեռևս ուսումնասիրվում են։