Իրանի ազգային նավթավերամշակման ընկերության հաղորդմամբ՝ ԱՄՆ նախագահ Դոնալդ Թրամփի և Թեհրանի միջև երկշաբաթյա հրադադարի շուրջ համաձայնության ձեռքբերումից անմիջապես հետո Իրանի նավթավերամշակման գործարանում հզոր պայթյուններ են որոտացել։
Ապրիլի 8-ին Սպիտակ տան ղեկավարը հայտարարել էր վերջին պահին ձեռք բերված պայմանավորվածության մասին, որը հաջորդել էր նրա իսկ սարսափելի սպառնալիքին, թե «այս գիշեր մի ամբողջ քաղաքակրթություն կկործանվի»։
Թրամփի խոսքով՝ ինքը համաձայնել է երկու շաբաթով կասեցնել Իրանի ռմբակոծություններն ու հարձակումները այն պայմանով, որ Հորմուզի նեղուցով բեռնափոխադրումների համար ապահովվի ազատ տեղաշարժ։
Իրանի արտգործնախարար Աբբաս Արաղչին, իր հերթին, նշել է, որ Թեհրանը կհամաձայնի դադարեցնել ռազմական գործողությունները, եթե Իրանի դեմ հարձակումները նույնպես դադարեն։
Սակայն, ինչպես հայտնում է իրանական Mehr լրատվական գործակալությունը, հրադադարի մասին լուրերից անմիջապես հետո Պարսից ծոցի Լավան կղզում գտնվող նավթավերամշակման գործարանում պայթյուն է տեղի ունեցել։ Միջադեպի պատճառներն ու աղբյուրն առայժմ հայտնի չեն։
