ՀՀ իշխանություններն այսօր ձգտում են առավելագույնս օգտագործել ԵԱՏՄ-ին անդամակցության առավելությունները՝ զուգահեռաբար քայլեր ձեռնարկելով Եվրոպական միությանն ինտեգրվելու ուղղությամբ, կարծում է տնտեսագետ Հրանտ Միքայելյանը
ԵՐԵՎԱՆ, 6 ապրիլ․/ԱՌԿԱ/․ Հայաստանի իշխանություններն այսօր ձգտում են առավելագույնս օգտագործել ԵԱՏՄ-ին անդամակցության առավելությունները՝ զուգահեռաբար քայլեր ձեռնարկելով Եվրոպական միությանն ինտեգրվելու ուղղությամբ, կարծում է տնտեսագետ Հրանտ Միքայելյանը:
«Այս պահին Հայաստանի իշխանությունների նպատակները հետևյալն են՝ առավելագույնս օգտվել ԵԱՏՄ օգուտներից, իսկ հետո փորձել ինտեգրվել ԵՄ-ին, իսկ եթե դա չստացվի՝ քաղաքականությունը զարգացնել Թուրքիայի ուղղությամբ»,- հայտարարել է Միքայելյանը ուրբաթ օրը «ԱՌԿԱ» գործակալությանը տված բացառիկ հարցազրույցում՝ պատասխանելով առաջիկա 2–3 տարում ԵՄ-ի և ԵԱՏՄ-ի միջև Հայաստանի կողմից հավասարակշռության պահպանման հավանականության և այդ հարցում հանրապետության հետագա հեռանկարների մասին հարցին:
Նրա խոսքով՝ Ռուսաստանում կարծում են, որ Հայաստանը փորձում է առաջ շարժվել Արևմուտքի ուղղությամբ՝ ռուսական ռեսուրսների հաշվին:
«Հայաստանի իշխանությունն արդեն կատարել է այսպես կոչված «ընտրությունը» և շարժվում է այդ ուղղությամբ: ԵՄ-ի հետ ցանկացած հարաբերություն զարգանում է շատ դանդաղ, և դա գալիս է ԵՄ-ից, այլ ոչ թե Հայաստանից: ԵՄ-ն, օրինակ, պատրաստ չէ ընդառաջ գնալ Հայաստանին վիզաների ազատականացման հարցում»,- նշել է Միքայելյանը:
Նա ընդգծել է, որ կարևոր է հաշվի առնել այս գործոնը: «Քաղաքականությունը վարվում է շատ դանդաղ, բայց դա չի նշանակում, որ ոչինչ չի լինելու: Այդ կուրսը իրականացվելու է»,- ասել է տնտեսագետը:
ՀՀ վարչապետ Նիկոլ Փաշինյանն ավելի վաղ հայտարարել էր, որ Հայաստանը շարժվում է դեպի ԵՄ ստանդարտների համապատասխանեցում՝ պահպանելով անդամակցությունը ԵԱՏՄ-ին: Նրա խոսքով՝ քանի դեռ հնարավոր է համատեղել, Հայաստանը կմնա Եվրասիական տնտեսական միության անդամ, իսկ երբ դա անհնար դառնա, «մենք Հայաստանի քաղաքացիների հետ միասին կկայացնենք որոշում, որը թելադրված կլինի Հայաստանի ժողովրդի կամքի ազատ արտահայտմամբ»:
Ռուսաստանի իշխանությունների ներկայացուցիչները բազմիցս հայտարարել են, որ ԵՄ-ին և ԵԱՏՄ-ին միաժամանակյա անդամակցությունը տնտեսապես անհամատեղելի է: Օրերս փոխվարչապետ Ալեքսեյ Օվերչուկը հայտարարել էր, որ Եվրամիությանը Հայաստանի միացման շուրջ բանակցությունները երկար տարիներ կտևեն, եթե նման հնարավորություն առաջանա, և Երևանը ստիպված կլինի ընտրություն կատարել ԵՄ-ի և ԵԱՏՄ-ի միջև: Նա նաև առաջարկել է հայկական բիզնեսին սթափ գնահատել ԵՄ-ում վաճառքների հեռանկարները: