ՆԱՍԱ-ի չորս տիեզերագնացները, որոնք գտնվում են «Արտեմիս II» տիեզերանավի վրա, պաշտոնապես սկսել են իրենց ճանապարհորդությունը դեպի Լուսին՝ ապրիլի 1-ի պատմական մեկնարկից հետո մեկ օր անցկացնելով Երկրի ուղեծրում։
«Տիկնայք և պարոնայք, մեծ ուրախությամբ տեղեկացնում եմ ձեզ, որ 1972 թվականի «Ապոլոն 17»-ից ի վեր առաջին անգամ մարդիկ լքել են Երկրի ուղեծիրը։ Այս պահից սկսած՝ ուղեծրային մեխանիկայի օրենքները մեր անձնակազմին կտանեն Լուսին, թույլ կտան մեզ շրջանցել նրա հակառակ կողմը և վերադառնալ Երկիր»,- մամուլի ասուլիսում ասել է ՆԱՍԱ-ի խոսնակ Լորի Գլեյզը։
Տիեզերագնացները կրում են տիեզերական համազգեստներ, որոնք նաև ծառայում են որպես «գոյատևման համակարգ». խցիկի ճնշման իջեցման կամ արտահոսքի դեպքում դրանք կպահպանեն թթվածինը, ջերմաստիճանը և ճնշումը վեց օր։
Եթե ամեն ինչ հարթ ընթանա, տիեզերագնացները ռեկորդ կսահմանեն՝ թռչելով Երկրից ավելի հեռու, քան նախկինում որևէ մարդ։
«Սա սովորական բան չէ։ Չորս մարդու 250․000 մղոն հեռավորության վրա ուղարկելը հերկուլեսյան առաջադրանք է, և մենք նոր ենք սկսում գնահատել դրա ողջ մասշտաբը»։
«Արտեմիս II» առաքելությունը Լուսին բազմիցս վերադառնալու երկարաժամկետ ծրագրի մի մասն է՝ մշտական բազա ստեղծելու համար, որը կծառայի որպես հետագա հետազոտությունների հարթակ։
10-օրյա առաքելության նպատակն է հիմք դնել 2028 թվականին Լուսնի վրա վայրէջքի համար։
