Վարչապետ Նիկոլ Փաշինյանի մասնակցությամբ Սուրբ Աննա եկեղեցում տեղի ունեցած միջադեպի վարույթով կալանավորված 18-ամյա Դավիթ Մինասյանի մայրը՝ Գայանե Մինասյանը, դիմել է ՀՀ ԿԳՄՍ նախարար Ժաննա Անդրեասյանին։ Նրա դիմումը հրապարակել է Մինասյանի փաստաբան Լուսինե Մարտիրոսյանը։
Տղայի մայրը նախարարից խնդրել է երաշխավորություն տալ առողջական խնդիրներ ունեցող որդու կալանքը փոխելու համար։
Մինասյանի մայրը նախարարին հիշեցրել է, որ իր կողմից որդուն 2023 թվականին տրվել է հիմնական կրթության գերազանցության վկայական, որը փաստաբանը նույնպես հրապարակել է։
Մինասյանի և Փաշինյանի միջև միջադեպ էր տեղի ունեցել մարտի 29-ին՝ Սուրբ Աննա եկեղեցում պատարագին։ Ըստ տեսանյութերի՝ պատարագի ընթացքում նա Փաշինյանին ասել էր, որ «ինքն ուզում է մեջտեղում կանգնել», երբ վարչապետն անվտանգության աշխատակիցների ու մյուս պաշտոնյաների հետ փորձում էր դուրս գալ եկեղեցուց՝ պատարագը դեռ չավարտված: Արդյունքում՝ քաշքշոց էր սկսվել։ Դեպքի առնչությամբ ձերբակալվել էին Մինասյանը, իր երկվորյակ եղբայրը՝ Միքայել Մինասյանը, և «Համահայկական ճակատ» շարժման հիմնադիր Գևորգ Գևորգյանը։
Միջադեպի առթիվ քրեական վարույթ էր նախաձեռնվել, ավելի ուշ նրանց նկատմամբ քրեական հետապնդում էր հարուցվել։ Միքայել Մինասյանը և Գևորգյանն ազատ էին արձակվել մարտի 31-ին՝ գրավի ու բացակայելու արգելքի հիմքով, իսկ Դավիթ Մինասյանին կալանավորելու միջնորդություն էր ներկայացվել։ Ապրիլի 1-ին Դավիթ Մինասյանին 2 ամսով կալանավորելու որոշում էր կայացվել, նրան ավելի ուշ հիվանդանոց, իսկ հետո կրկին ՔԿՀ էին տեղափոխել։
Կարդացեք նաև՝
