Ռուսաստանի փոխվարչապետ Ալեքսեյ Օվերչուկը ՏԱՍՍ-ին տված հարցազրույցում հայտարարել է, որ եթե Երևանը չորոշի մինչև 2026 թվականի վերջը նոր ատոմակայան կառուցել, ապա կարող է ազգային էներգետիկ դեֆիցիտի առաջ կանգնել։
Օվերչուկը նշել է, որ ռուսական կողմը չի խոսում Մեծամորի ԱԷԿ-ի շահագործումը մինչև 2046 թվականը երկարաձգելու մասին։
«Նոր ատոմակայանի նախագծման, կառուցման և շահագործման ցիկլը սովորաբար տևում է մոտ 10 տարի։ Մենք հասկանում ենք, որ եթե նոր ատոմակայանի կառուցման վերաբերյալ որոշում չընդունվի մինչև այս տարվա վերջը, մոտ ապագայում կարող է ստեղծվել իրավիճակ, երբ Մեծամորի ԱԷԿ-ը կփակվի մինչև նոր ատոմակայանի կառուցումը։
Մենք նաև համոզված ենք, որ միայն Ռուսաստանն ունի այն տեխնոլոգիաները, որոնք անհրաժեշտ են Հայաստանին»,- նշել է նա։
Ըստ Օվերչուկի՝ ասվում է մի բան, բայց իրականությունը բոլորովին այլ է։
«Սա երկարաժամկետ բացասական հետևանքներ կունենա Հայաստանի, և հնարավոր է՝ նաև հարևանների համար։ Երկրի էներգետիկ դեֆիցիտը, հավանաբար, կծածկվի ներմուծմամբ, ինչը միշտ թանկ է սպառողների համար։ Կներդրվի նաև վերականգնվող էներգիայի արտադրություն, բայց սա նույնպես լուծում չէ»,- ընդգծեց Ռուսաստանի փոխվարչապետը։
Փետրվարի 3-ին տարածքային կառավարման և ենթակառուցվածքների նախարար Դավիթ Խուդաթյանը հայտարարել էր, որ Հայաստանը որոշել է ապագա ատոմակայանի տեսակը (մոդուլային տարբերակ)՝ Մեծամորի գործող ատոմակայանը փոխարինելու համար։
Երկիրը քննարկում է Ռուսաստանի, ԱՄՆ-ի, Չինաստանի, Կորեայի Հանրապետության և Ֆրանսիայի առաջարկները։
Փետրվարի 9-ին՝ ԱՄՆ փոխնախագահ Ջ.Դ. Վենսի՝ Երևան կատարած այցի ժամանակ, հայտարարվել էր քաղաքացիական ատոմային էներգիայի վերաբերյալ համաձայնագրի մասին, որը, ի վերջո, թույլ կտա ամերիկյան ընկերություններին Հայաստանին մատակարարել մոտ 9 միլիարդ դոլարի արժողությամբ ապրանքներ և ծառայություններ, այդ թվում՝ փոքր մոդուլային ռեակտորներ։