Կանազի շենքի ճակատագրի վերաբերյալ քննարկումներ եղել են թե քաղաքապետւի, թե փոխքաղաքապետի գլխավորությամբ։ Լրագրողների հետ զրույցում ասել է Արաբկիր վարչական շրջանի ղեկավար Սուրեն Վարոսյանը։
Նրա խոսքով, հիմա շենքի վերակառուցման նախագիծ է մշակվում, որպեսզի այն հետագայում ծառայի բնակիչներին։
«Համենայն դեպս շենքը քանդելու ոչ մի ծրագիր քաղաքապետարանը չունի, ունի վերակառուցելու ու ժողովրդին ծառայեցնելու մտադրություն»,-ասաց վարչական շրջանի ղեկավարը՝ անդրադառնալով այն խոսակցություններին, որ մտադրություն կա շենքը վերածել հյուրանոցի կամ տեղում բազմաբնակարան համալիր կառուցել։
«Ես բացառում եմ նմանատիպ որևէ քննարկում»,-նշեց Վարոսյանը;
Նրա խոսքով, ՆԳՆ փրկարար ծառայության աշխատակիցների հետ քիչ առաջ զրուցել է, ասել են, որ հնարավոր է պահպանել շենքի ճարտարապետական տեսքը, վերակառուցումն էլ կլինի ճարտարապետական տեսքի պահպանմամբ։
Հիշեցնենք, որ երեկ երեկոյան ժամը 19։12-ին ՆԳՆ ՓԾ-ն ահազանգ է ստացել, որ հրդեհը բռնկվել է Երևանի Ազատության պողոտայի 19 հասցեում գտնվող նախկին «Կանազ» մշակույթի տան չգործող չորսհարկանի շինությունում։ Հրդեհը կարողացել են մարել ավելի քան չորս ու կես ժամ հետո՝ ժամը 23։44-ին։
Հրշեջ-փրկարարներին հաջողվել է կանխել հրդեհի տարածումը դեպի շինության առաջին հարկ և հարակից բնակելի շենքեր։