ԱՄՆ Կոնգրեսի հանրապետականների շրջանում ակտիվորեն քննարկվում է Իրանի դեմ հնարավոր ցամաքային ռազմական գործողության մեկնարկը, ինչի մասին հայտնել է WSJ-ի լրագրող Ալեքս Ուորդը։ Ըստ առկա տեղեկությունների՝ գործողությունն արդեն պլանավորված է, իսկ հիմնական թիրախներից մեկը կարող է դառնալ Հարք կղզին, որի միջոցով իրականացվում է իրանական նավթի արտահանման շուրջ 90%-ը։ Չնայած Դոնալդ Թրամփի հայտարարություններին, թե հակամարտությունը մոտ է ավարտին, նա միաժամանակ չի բացառում զորքերի մուտքը Իրան։
Սպիտակ տանը ներկայումս միասնական դիրքորոշում չկա. Թրամփի շրջապատի մի մասը պահանջում է իշխանափոխություն Թեհրանում, մինչդեռ մյուսները զգուշանում են երկարատև ու արյունալի պատերազմից։ Նախագահ Թրամփը դեռևս վերջնական որոշում չի կայացրել՝ տատանվելով ճնշումն ուժեղացնելու և ամերիկյան զինուժի շրջանում հնարավոր մեծաթիվ կորուստներից խուսափելու միջև, հատկապես, երբ արդեն իսկ կան զոհեր զինվորականների շրջանում։