Աշխարհում անցել են այնպիսի մոդելի, որ սահմանային առաջին կետերում հիմնականում տեղակայվում են տեխնիկական միջոցներ, որոնք մինչև 25 կմ խորությամբ վերահսկում են հակառակորդի կամ սահմանակցի շարժը և կարողանում են տալ կանխարգելիչ տեղեկություններ, որպեսզի հիմնական ուժերը դուրս գան պաշտպանական դիրքեր։ Այս մասին «Ուժեղ խաղաղություն» անվտանգության ծրագրի ներկայացման ժամանակ լրագրողների հետ զրույցում ասել է «Ուժեղ Հայաստան» կուսակցության խորհրդի անդամ Նարեկ Կարապետյանը։
Նարեկ Կարապետյանի խոսքով՝ դիրքերում մշտական տեղակայված զինծառայողների թիվը պետք է կրճատվի, քանի որ նրանք պետք է նախ վերապատրաստվեն և դիրքեր բարձրանան այն ժամանակ, երբ դրա անհրաժեշտությունը լինի։
«Ինչպես մեզ բացատրում են մասնագետները՝ աշխարհը պոստային համակարգից անցում է կատարում խելացի սահմանի համակարգին։ Սահմանը կենտրոնական շտաբին տեղյակ է պահում, որ կա շարժ և այդ ժամանակ այնտեղ հատուկ խմբեր են գործուղվում։ Իհարկե, ես մի փոքր պարզեցված եմ ներկայացնում։ Այս ամենի հիմնական նպատակն այն է, որ զորքը վերապատրաստում անցնի և դիրքեր բարձրանա միայն անհրաժեշտության դեպքում։ Այսինքն, դիրքերում տեղակայված զինծառայողների թիվը պետք է կրճատվի, քանի որ նրանք պետք է նախ վերապատրաստում անցնեն։ Հիմա մենք բանակցում ենք, որպեսզի մեր երկիրը կարողանա կնքել պայմանագիր խելացի սահմանների ստեղծման մասին»,- ընդգծել է Նարեկ Կարապետյանը։