Իրանը խիստ պայմաններ է սահմանել Թրամփի վարչակազմի հետ հրադադարի շուրջ բանակցություններին վերադառնալու համար՝ պահանջելով արմատական զիջումներ, որոնք էապես փոխում են տարածաշրջանային ուժերի դասավորությունը։ Ինչպես հայտնում է «The Wall Street Journal»-ը՝ հղում անելով իրազեկ աղբյուրներին, Թեհրանի ներկայացրած պահանջների թվում են Մերձավոր Արևելքում ամերիկյան ռազմական ներկայության դադարեցումը և Ծոցում գտնվող բոլոր բազաների փակումը։ Բացի այդ, Իրանը պահանջում է ամբողջական պատժամիջոցների չեղարկում, ռեպարացիաներ իր դեմ իրականացված հարձակումների համար և սեփական հրթիռային ծրագիրն առանց սահմանափակումների պահպանելու իրավունք։
Իրանական կողմի հավակնությունները տարածվում են նաև տնտեսական և ռազմավարական վերահսկողության ոլորտների վրա։ Թեհրանը ցանկանում է ներդնել նոր համակարգ Հորմուզի նեղուցում, որը թույլ կտա իրեն տարանցիկ վճարներ գանձել անցնող նավերից, ինչպես նաև պահանջում է դադարեցնել Իսրայելի հարվածները «Հեզբոլլահի» ուղղությամբ և երաշխիքներ ստանալ, որ պատերազմը չի վերսկսվի։
Ամերիկյան բարձրաստիճան պաշտոնյաները Թեհրանի այս պահանջները որակել են որպես բացարձակ անիրատեսական։ Արաբ և ամերիկացի փորձագետների կարծիքով՝ նման առավելապաշտական դիրքորոշումը գրեթե անհնարին է դարձնում որևէ կայուն համաձայնության ձեռքբերումը մոտ ապագայում, քանի որ ներկայացված պայմանները հակասում են Վաշինգտոնի և նրա տարածաշրջանային դաշնակիցների հիմնարար շահերին։