Մարտի 16-ին Արարատի մարզից «կլինիկական մահ» ախտորոշմամբ «Արաբկիր» բժշկական կենտրոն էր տեղափոխվել մանկահասակ տղա երեխա․ հայ հասարակության քննարկման և ուշադրության առանցքում դեռ նախորդ շաբաթվանից շարունակում էր մնալ հենց այս դեպքը։
Երեխային, ըստ իրավապահների նախնական վարկածի, ծեծել էր խորթ մայրը։ Նա 2 ամսով կալանավորվել էր, Armenia today-ը տեղեկացել էր ՀՀ գլխավոր դատախազությունից։ ՆԳ նախարար Արփինե Սարգսյանի տեղեկացմամբ՝ գործում որպես մեղադրյալ ներգրավվել է նաև երեխայի հայրը։ Ի պատասխան մեր խմբագրության հարցին՝ նախարարը չէր բացառել ընտանիքի մյուս անդամներին ևս մեղադրանք առաջադրելու հնարավորությունը։
Ամբողջ ընթացքում երեխան գտնվել է վերակենդանացման բաժանմունքում։ Ի սկզբանե՝ բժիշկները երեխայի վիճակը գնահատել էին ծայրահեղ ծանր և պայքարել նրա կյանքի համար։ Մարտի 21-ին երեխան մահացել էր․ այս մասին Armenia Today-ը տեղեկացել է բուժհաստատությունից։
Այս դեպքի մասին Armenia Today-ը հարցում է անցկացրել Երևանում՝ հասկանալու համար, արդյոք քաղաքացիները դեպքը բռնությո՞ւն են համարում, ո՞ւմ են մեղադրում և նման դեպքերը նվազեցնելու համար ի՞նչ օրենսդրական փոփոխությունների կարիք են տեսնում։
Առանց բացառության՝ հարցված բոլոր քաղաքացիները դեպքը բռություն են համարել։ Նրանցից ոմանք կատարվածի համար բացառապես մեղադրել են ընտանիքին, մասնավորապես՝ ծնողներին և խորթ մորը։
«Ծնողներն են մեղավոր, բայց այլ ավելի շատ՝ հայրը, որ տեր չի կանգնել իր զավակին»,- այսպես է ասել քաղաքացիներից մեկը։
Որոշ քաղաքացիներ էլ կատարվածի համար մեղադրել են պատկան մարմիններին՝ սոցիալական ծառայություններին, համայնքային պատասխանատուներին և ոստիկանությանը։
«Համայնքում բոլորն իմանում են, որ կա նման ընտանիք, իսկ եթե նման խնդիր կա, ուրեմն պետք է համայնքի ղեկավարը կամ համապատասխան մարմինները կարողանան ժամանակին ցուցաբերել անհրաժեշտ օգնություն, որպեսզի գործը դրան չհասնի»,- ասել է քաղաքացին։
Ոմանք էլ կատարվածի համար մեղադրում են հասարակությանը՝ անտարբերության ու տիրող բարքուվարքի համար։
«Սա մեր հասարակության դաստիարակության արդյուքն է»,- ասել է մեկ այլ հարցվող։
Հարցվածներից մի քանիսն էլ կարծում են, որ նման դեպքերը շատացել են ոչ միայն ընտանիքներում, այլև մանկապարտեզներում և դպրոցներում՝ դա պատճառաբանելով օրենքի բացակայությամբ։
«Օրենք գոյություն չունի Հայաստանում, որովհետև ոչ մեկս պաշտպանված չենք ո՛չ տանը, ո՛չ այլ միջավայրում»,- ասել է քաղաքացին։
Մանրամասները՝ տեսանյութում։
