23 մարտի 2026 – 16:20 AMT
PanARMENIAN.Net – ԱՄՆ նախագահ Դոնալդ Թրամփը հանձնարարել է երկրի պաշտպանության նախարարությանը 5 օրով հետաձգել հարվածներն Իրանի էներգետիկ ենթակառուցվածքներին։ Այդ մասին նա գրառում է կատարել Truth Social հարթակում:
Նա նշել է, որ որոշումը պայմանավորված է ԱՄՆ և Իրանը միջև վերջին օրերին տեղի ունեցած արդյունավետ բանակցություններով:
«Ելնելով այս խորացված, մանրամասն և կառուցողական բանակցությունների բնույթից և տոնից, որոնք շարունակվելու են ամբողջ շաբաթվա ընթացքում, ես հանձնարարել եմ պատերազմի նախարարությանը հինգ օրով հետաձգել Իրանի էլեկտրակայանների և էներգետիկ ենթակառուցվածքների դեմ ցանկացած ռազմական հարված՝ պայմանով, որ ընթացիկ հանդիպումներն ու քննարկումները հաջողությամբ ավարտվեն», – նշել է Թրամփը։
Իրանի հեղափոխության պահապանների կորպուսն ավելի վաղ հայտարարել էր, որ եթե Թրամփն իրականացնի Իրանի էներգետիկ համակարգը «ոչնչացնելու» իր սպառնալիք, ապա իրենք կհարվածեն Իսրայելի էլեկտրակայաններին և այն օբյեկտներին, որոնք էներգիա են մատակարարում ԱՄՆ բազաներին Պարսից ծոցի տարածաշրջանում։
ՄԱԿ-ում Իրանի մշտական ներկայացուցիչ Ամիր Սայիդ Իրավանին ՄԱԿ-ի գլխավոր քարտուղար Անտոնիու Գուտերեշին հղած նամակում նշել էր, որ Թեհրանն անհամաչափ է համարում նախագահ Դոնալդ Թրամփի այն սպառնալիքները:
Թրամփն ավելի վաղ ասել էր, որ Իրանի հետ որևէ համաձայնագիր չի կնքվի «անվերապահ կապիտուլյացիայից» բացի։