Հասարակական գործիչ Կարեն Հեքիմյանը ֆեյսբուքյան իր էջում գրել է․ «Հայ հասարակության ակտիվ սեգմենտներից մի քանիսը վստահ են՝ Կարապետյան Սամվելը, Քոչարյան Ռոբերտը, Ծառուկյան Գագիկը Կրեմլի հովանավորյալներ են:
Եթե այդպես է, ապա Կրեմլում գիտեն չէ՞, որ վերջիններս իրենց հովանու ներքո են գործում: Եվ, եթե գիտեն, ապա ինչո՞ւ են ՄԻԱԺԱՄԱՆԱԿ հովանավորում այդ երեք, ռեսուրսներով գրեթե ՀԱՎԱՍԱՐԱԶՈՐ անձանց: Իմա՞ստը:
Եթե ապրիորի ընդունենք, որ նշված անձանց օգտին քվեարկելու է Հայաստանի ընտրողների ընդդիմադիր զանգվածը, ապա իրականում ո՞րն է պայմանական ընդդիմության ձայների փոշիացման իմաստը:
Տրամաբանորեն, կա մի քանի բացատրություն՝
1. Կրեմլը ցանկանում է փոշիացնել ընդդիմության ձայները հօգուտ Փաշինյան Նիկոլի,
2. Կրեմլը չի տիրապետում հայաստանյան իրական անցուդարձին վերաբերող տեղեկատվությանը,
3. Կրեմլը միասնական չէ և, խաղադրույք կատարելիս, չի կողմնորոշվել՝ երեք խաղադրույք է կատարել:
Հետաքրքիրն այն է, որ Կրեմլի «չկողմնորոշվելու» և «անտեղյակ» լինելու վարկածները ևս անուղղակի ապացուցում են վերջինիս՝ հօգուտ Փաշինյան Նիկոլի գործելու վարկածը: «Չկողմնորոշվելն» ու «անտեղյակ» լինելը ռիսկային է՝ մեծամասամբ պարտության հիմք է: Այդ իմաստով, եթե Կրեմլը «չկողմնորոշված» և «անտեղյակ» գնում է ընտրությունների, ապա դե ֆակտո ցանկանում է, որ օրվա իշխանությունը վերարտադրվի:
Այսինքն, ստացվում է, որ բոլոր դեպքերում, ըստ Հայաստանում առկա քաղաքական դասավորության, գոնե այս պահին Կրեմլի համակրանքը Փաշինյան Նիկոլի կողմն է»: