Իրանի արտաքին գործերի նախարար Աբաս Արաղչին, մեկնաբանելով Ալի Լարիջանիի սպանությունը, հայտարարել է, որ Վաշինգտոնն ու Թել Ավիվը դեռևս չեն ըմբռնել Իսլամական Հանրապետության պետականության հիմնարար սկզբունքները։
Ըստ նախարարի՝ Իրանն օժտված է կայացած քաղաքական, տնտեսական և սոցիալական ինստիտուտներով, որոնց կայունությունը պայմանավորված չէ կոնկրետ անհատների ներկայությամբ կամ բացակայությամբ։ Արաղչին շեշտել է, որ նույնիսկ երկրի գերագույն առաջնորդի նահատակության պարագայում համակարգն անմիջապես ապահովել է փոխարինող և շարունակել իր անխափան գործունեությունը, ինչը վկայում է կառույցի ամրության մասին։
Նա հավելել է, որ ցանկացած այլ պաշտոնյայի, այդ թվում՝ արտաքին գործերի նախարարի հնարավոր մահը չի կարող խաթարել պետական մեքենայի աշխատանքը, քանի որ համակարգը միշտ պատրաստ է առաջադրել նոր առաջնորդների՝ նախկինների տեղը զբաղեցնելու համար։
«Մենք չենք ունեցել առաջնորդից ավելի կարևոր մեկին, նույնիսկ նրա նահատակվելուց հետո համակարգը շարունակեց աշխատել։ Եթե ԱԳ նախարարը երբևէ նահատակվի, ի վերջո կգտնվի ինչ-որ մեկը, որը կզբաղեցնի այդ պաշտոնը»,- ասել է նա։