ԱՄՆ պետքարտուղար Մարկո Ռուբիոն ամերիկացի դիվանագետներին հանձնարարել է օտարերկրյա կառավարություններին օպերատիվ գործողությունների կոչ անել Իրանի և նրա հետ կապված խմբավորումների հնարավորությունները սահմանափակելու համար: Այս մասին հայտնում է ABC News-ը՝ վկայակոչելով Պետդեպարտամենտի պաշտոնական հեռագիրը։
Փաստաթղթում ասվում է Իրանի և նրա դաշնակիցների կողմից «հարձակումների մեծ ռիսկի» մասին։ Դիվանագետներին հանձնարարվել է համապատասխան դիրքորոշումը հասցնել օտարերկրյա գործընկերներին ամենաբարձր մակարդակով մինչև մարտի 20-ը։ Դատելով հեռագրից, գրում է ABC News-ը, Վաշինգտոնում կարծում են, որ կոլեկտիվ ճնշումն ավելի արդյունավետ է, քան միակողմանի միջոցները և կարող է Թեհրանին ստիպել փոխել վարքը:
Հեռագրում նաև ընդգծվում է միջազգային հանրության ներկայիս ուշադրությունից օգտվելու անհրաժեշտությունը:
ԱՄՆ նախագահ Դոնալդ Թրամփի վարչակազմը ձգտում է ընդլայնել միջազգային աջակցությունը Իրանի դեմ իր ռազմական արշավին, այդ թվում ՝ Հորմուզի նեղուցի վերահսկողության կոալիցիա կազմելու համար: Բացի այդ, դիվանագետներին հանձնարարված է համոզել երկրներին ԻՀՊԿ-ն և «Հեզբոլլահը» ճանաչել ահաբեկչական կազմակերպություններ, եթե դա դեռ չի արվել: Պետդեպարտամենտում պնդում են, որ նման միջոցառումները կուժեղացնեն Իրանի վրա ճնշումը և կսահմանափակեն զինված խմբավորումներին աջակցելու նրա հնարավորությունները:
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ այաթոլլա Ալի Խամենեիի մահը: Երկու կողմում էլ զոհերի թիվը ժամ առ ժամ փոխվում է։
