ԱԺ «Հայաստան» խմբակցության պատգամավոր Մհեր Մելքոնյանի ֆեյսբուքյան գրառումը. «Օրերս շիրակցի մի ՔՊ-ական սոցիալական ցանցում գրել էր․ «Մենք ընտրում ենք խաղաղությունը։ Խաղաղության այլընտրանքը պատերազմն է…»։
Սա այն պարզեցված և վտանգավոր թեզերից է, որով օրվա իշխանությունները փորձում են հասարակությանը կանգնեցնել կեղծ ընտրության առաջ՝ իբր կա միայն երկու տարբերակ՝ կամ պատերազմ, կամ այն, ինչ այսօր կոչվում է «խաղաղություն»։
Բայց ճշմարտությունը այլ է։
Ո՛չ, պարոնայք ՔՊ-ականներ, դուք սխալվում եք։
Խաղաղության այլընտրանքը պատերազմը չէ։ Խաղաղության իրական այլընտրանքն արժանապատիվ խաղաղությունն է։
Այն խաղաղությունը, որը ձեռք է բերվում ուժեղ պետությամբ, հստակ դիրքորոշմամբ, ազգային արժանապատվությամբ և սեփական շահերը պաշտպանելու կարողությամբ։
Այն խաղաղությունը, որը չի կառուցվում միակողմանի զիջումների, պարտադրված պայմանների և ազգային արժանապատվության հաշվին։
Պատմությունը շատ պարզ օրենք ունի․ խաղաղությունը մուրացողներին չեն տալիս։
Խաղաղությունը պարտադրում են՝ ուժով, պետական կամքով, դիվանագիտական հմտությամբ և ազգային միասնականությամբ։
Ով չի կարողանում պաշտպանել իր իրավունքները, նա վաղ թե ուշ կորցնում է նաև իր «խաղաղությունը»։
Հայ ժողովուրդը երբեք չի ընտրել խոնարհում՝ խաղաղության անվան տակ։
Մենք ընտրել ենք պայքարել, պաշտպանել մեր հողը, մեր արժանապատվությունը և մեր պետականությունը։
Ուստի հասարակությանը մի դրեք կեղծ ընտրության առաջ։
Հայ ժողովուրդը պետք է ընտրի ոչ թե ցանկացած խաղաղություն, այլ ուժեղ պետության կողմից կերտված արժանապատիվ խաղաղություն։
Որովհետև միայն այդպիսի խաղաղությունն է երկարատև։
Մնացածը պարզապես ժամանակավոր դադար է….»