10 մարտի 2026 – 17:48 AMT
PanARMENIAN.Net – Ադրբեջանը Հայաստանին ներքաշեց հակաիրանական արշավի մեջ, այնուհետև վերադասավորվեց և այժմ հանդես է գալիս որպես Իրանի բարեկամ պետություն, գրել է ԱԺ նախկին պատգամավոր, հատուկ հանձնարարություններով նախկին դեսպան Էդմոն Մարուքյանը:
Նա թվարկել է վերջին օրերին Ադրբեջանի և Իրանի միջև տեղի ունեցած զարգացումները:
Նրա խոսքով՝ սկզբում Ադրբեջանի նախագահ Իլհամ Ալիևը այցելել է Ադրբեջանում Իրանի դեսպանատուն և ցավակցություն հայտնել Իրանի գերագույն առաջնորդի մահվան կապակցությամբ, որից հետո, մարտի 5-ին, ադրբեջանական ԶԿՄ-ները հայտնել են, թե իբր Իրանից արձակված ԱԹՍ է ընկել են Նախիջևանի տարածքում։
«Դրանից հետո Ադրբեջանից հնչել են կոշտ հայտարարություններ Իրանի հասցեին։ Ադրբեջանի անվտանգության խորհրդի արտակարգ նիստի ընթացքում Ալիևը հայտարարել է, որ «Նախիջևանի ուղղությամբ իրանական անօդաչու սարքերի հարվածը» դիտարկում է որպես ահաբեկչություն Ադրբեջանի դեմ։ Մինչդեռ Իրանի զինված ուժերի գլխավոր շտաբը, արտաքին գործերի նախարարությունը և Բաքվում Իրանի դեսպանատունը պաշտոնապես հերքել են այդ տեղեկությունները։
Դրանից հետո Ադրբեջանը փակել է Իրանի հետ օդային սահմանը, ամբողջությամբ դադարեցրել բեռնատարների տեղաշարժը:
Միևնույն ժամանակ, ըստ նրա, Ադրբեջանը տարբեր երկրներից աջակցություն է խնդրել և ստացել, այդ թվում՝ Հայաստանից։ Հայաստանի դրոշը օգտագործվել է հակաիրանական գրառման մեջ։
Մարտի 8-ին Ալիևը հեռախոսազրույց է ունեցել Իրանի նախագահ Մասուդ Փեզեշքյանի հետ, որի ընթացքում վերջինս վերահաստատել է, որ Իրանի կողմից Ադրբեջանի նկատմամբ որևէ հարձակում չի եղել։
Այդ զրույցից հետո Ադրբեջանը կրկին բացել է սահմանը բեռնատարների համար, իսկ ավելի ուշ Իլհամ Ալիևի հանձնարարությամբ հումանիտար օգնություն է ուղարկվել Իրան։
Այս իրադարձությունների շղթան հստակ ցույց է տալիս, թե ինչպես մի քանի օրվա ընթացքում Բաքուն Հայաստանին ներքաշեց հակաիրանական արշավի մեջ, հետո վերադասավորվեց և այժմ հանդես է գալիս որպես Իրանի բարեկամ պետություն»,- նշել է Մարուքյանը։
Ավելի վաղ հաղորդվել էր, որ Իրանն ԱԹՍ-ներով հարվածել է Նախիջևանի օդանավակայանին, ևս մի քանի անօդաչու թռչող սարքեր ընկել են այլ տարածքներում։ Բաքվում Իրանի դեսպան Մոջթաբա Դեմիրչիլուին կանչել են Ադրբեջանի ԱԳՆ, հանձնվել է բողոքի նոտա: