Իրանում Հայաստանի դեսպանության աջակցությամբ մարտի 9-ին Հայաստան է վերադարձել ՀՀ երկրորդ քաղաքացին, հայտնել է ԱԳՆ մամուլի խոսնակ Անի Բադալյանը:
Նրա խոսքով, Իրանում ՀՀ դեսպանությունը շարունակում է աշխատել արտակարգ ռեժիմով: Դիվանագիտական ներկայացուցչությունն ամեն օր ստանում է մոտ 20-25 դիմում, որոնք հիմնականում վերաբերում են հայ-իրանական սահմանը հատելու հնարավորությանը: Հայաստանի և Իրանի միջև սահմանի անցումն իրականացվում է սովորական ռեժիմով:
ԱԳՆ տվյալներով, Իրանում վերջին իրադարձությունների հետևանքով զոհվածների շրջանում ՀՀ քաղաքացիների առկայության մասին տեղեկություններ չկան:
Դիվանագիտական ներկայացուցչություն են շարունակում դիմել նաև օտարերկրյա քաղաքացիները՝ Հայաստան մուտք գործելու հնարավորության վերաբերյալ հարցերով: Նրանց տրամադրվում են անհրաժեշտ պարզաբանումներ և անհրաժեշտ առաջարկություններ:
Բացի այդ, դեսպանությունն աջակցություն է ցուցաբերում Իրանում հավատարմագրված մի շարք օտարերկրյա ներկայացուցչությունների դիվանագետներին և նրանց ընտանիքների անդամներին՝ Հայաստանի տարածքով իրենց հայրենի երկրներ վերադարձի կազմակերպման համար:
Ավելի վաղ Բադալյանը հայտնել էր, որ Իրանում ռազմական գործողությունների սկզբից ի վեր ՀՀ դեսպանություն են դիմել Հայաստանի Հանրապետության քաղաքացիություն ունեցող երկու անձինք: Նրանցից մեկն առանց խոչընդոտների վերադարձել է Հայաստան, իսկ երկրորդի վերադարձի կազմակերպման գործընթացը շարունակվել է, դեսպանությունը նրա հետ մշտական կապի մեջ է եղել:
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ այաթոլլա Ալի Խամենեիի մահը: Երկու կողմում էլ զոհերի թիվը ժամ առ ժամ փոխվում է։ Մարտի 1-ի՝ ժամը 15։30-ի դրությամբ, Մերձավոր Արևելքում զոհերի թվում հայեր չկան։
