ԱՄՆ նախագահի Դոնալդ Թրամփի հայտարարությամբ՝ Իրանի դեմ ամերիկյան ռազմական գործողության մեկնարկը տպավորություն է թողել Ռուսաստանի նախագահ Վլադիմիր Պուտինի վրա։ Այդ մասին Թրամփը խոսել է Ֆլորիդայում Հանրապետական կուսակցության համաժողովի ընթացքում։
Նրա խոսքով՝ գործողության թեման քննարկվել է երկու առաջնորդների միջև տեղի ունեցած հեռախոսազրույցի ժամանակ։ Թրամփը նշել է, որ Պուտինը մեծ տպավորություն է ստացել այն գործողություններից, որոնք իրականացրել են ԱՄՆ զինված ուժերը՝ ընդգծելով, որ «նման բան նախկինում ոչ ոք չի տեսել»։
Միևնույն ժամանակ ԱՄՆ նախագահը նշել է, որ Իրանը ունի ուժեղ և լավ զինված բանակ, սակայն հավելել է, որ վստահ է ամերիկյան սպառազինության և ԱՄՆ զինված ուժերի առավելության մեջ։
Ռուսաստանի նախագահի օգնական Յուրի Ուշակովն ավելի վաղ հայտնել էր, որ Պուտինն ու Թրամփը շուրջ մեկ ժամ տևած հեռախոսազրույց են ունեցել։ Զրույցը նախաձեռնվել է ամերիկյան կողմի կողմից, իսկ քննարկման հիմնական թեմաները վերաբերվել են միջազգային ընթացիկ իրավիճակին։ Ավելի վաղ Պուտինը նաև տեղեկացրել էր ռուսական զորքերի առաջխաղացման մասին Ուկրաինայում իրականացվող ռազմական գործողությունների գոտում։