Վարչապետ Նիկոլ Փաշինյանը Կանանց միջազգային օրվա առթիվ հղած ուղերձում նշել է, որ 2018 թվականի հեղափոխությունից հետո կանանց դերը հանրային կյանքում էապես մեծացել է: Նրա խոսքով՝ այսօր կանայք նախկինում չտեսնված ծավալով ներգրավված են երկրի կառավարման գործում:
«Ներքին գործերի նախարարություն, Արտաքին հետախուզության ծառայություն, Դատախազություն, Քրեակատարողական ծառայություն․ այս գերատեսչություններն այսօր կանայք են ղեկավարում, մի բան, որը ոչ միայն առաջին անգամ է մեր պատմության մեջ, այլև անհնարինի ժանրից կլիներ մեր նախահեղափոխական մտածողության մոդելներում»,- ընդգծել է վարչապետը:
Փաշինյանն առանձնացրել է «300 դպրոց, 500 մանկապարտեզ» ծրագիրը, որը, ըստ նրա, ոչ միայն երեխաներին ավելի լավ կրթություն ստանալու հնարավորություն է տալիս, այլև նրանց մայրերին՝ աշխատելու։
Փաշինյանը մտահոգություն է հայտնել ժողովրդագրական իրավիճակի կապակցությամբ: «Որքան շատ է հանրային, քաղաքական, տնտեսական կյանքում ներգրավված կինը, այնքան պակաս է հակված երեխա ունենալու, և սա մեծագույն խնդիր է մեր երկրի համար»,- ասել է նա:
Վարչապետը կարևորել է այնպիսի երկիր կառուցելու անհրաժեշտությունը, որտեղ առնվազն երեք երեխա ունենալը սովորական լինի յուրաքանչյուր կնոջ համար, բայց և չնշանակի պասիվացում, մեկուսացում հանրային, տնտեսական կյանքից: Այս համատեքստում նա ընդգծել է մանկապարտեզների կառուցման ծրագրի շարունակականությունը և մսուրային ծառայության հասանելիությունը ողջ հանրապետությունում:
