Նախիջևանի վրա իրանական ԱԹՍ-ների հարձակումից հետո Ադրբեջանում Իլհամ Ալիևի նախագահությամբ տեղի է ունեցել անվտանգության խորհրդի նիստ: Նիստին Ալիևը կոշտ և սուր է արտահայտվել Իրանի իշխանությունների հասցեին և սպառնացել պատասխան գործողություններով։
«Մենք չենք հանդուրժի այս անհիմն ահաբեկչական ակտը և Ադրբեջանի դեմ ուղղված ագրեսիան։ Մեր զինված ուժերին հանձնարարվել է պատրաստվել և իրականացնել պատասխան գործողություն»,- ասել է նա։
Ըստ նրա՝ երկիրը իրանական կողմից հավաստիացումներ է ստացել, հատկապես՝ անցյալ տարվա բախումներից հետո, որ Ադրբեջանի տարածքը չի օգտագործվի որևէ հարևան պետության դեմ։
«Անցյալ ամռանը և այդ ժամանակվանից ի վեր Իրանմ անհիմն մեղադրանքներ է առաջադրել մեր դեմ։ Իրանի պետական կառույցների կողմից վերահսկվող լրատվամիջոցները նողկալի, զրպարտչական արշավ են սկսել Ադրբեջանի դեմ՝ Ադրբեջանին վարկաբեկելու և Իրանում ապրող մեր հայրենակիցների կարծիքը փոխելու համար։ Նրանք լավ գիտեն, որ այսօրվա անկախ ադրբեջանական պետությունը նաև հույսի վայր է Իրանում ապրող շատ ադրբեջանցիների համար։ Այլ կերպ ասած, իրանական հանրության նպատակն էր մեզ վարկաբեկել, զրպարտել և վարկաբեկել։ Դրա համար որևէ հիմք չկար։ Ադրբեջանը չի մասնակցել և չի մասնակցելու Իրանի դեմ գործողություններին՝ ո՛չ այն ժամանակ, ո՛չ էլ հիմա։ Որովհետև դա մեր դիրքորոշումն է։ Մենք շահագրգռված չենք մեր հարևան երկրների դեմ որևէ գործողություն իրականացնելու հարցում, և մեր քաղաքականությունը դա թույլ չի տալիս։ Մենք պաշտպանում ենք և պաշտպանել ենք մեր տարածքային ամբողջականությունը»,- շեշտել է նա։