«Ուժեղ Հայաստան» կուսակցության քաղխորհրդի անդամ, «Մեր ձևով» շարժման համակարգող Նարեկ Կարապետյանն «Ազատության» հետ հարցազրույցում մեկնաբանել է կուսակցության առաջարկած սահմանադրական փոփոխությունների մեխանիզմը, ինչպես նաև խորհրդարանական ընտրություններից հետո նախկին նախագահների հետ կոալիցիոն կառավարություն ձևավորելու հնարավորությունը։
Նա հիշեցրել է, որ վարչապետի իրենց թեկնածուն կլինի կուսակցության նախագահ, «Տաշիր» ընկերությունների խմբի նախագահ Սամվել Կարապետյանը։
«Վարչապետի մեր թեկնածուն Սամվել Կարապետյանն է, մեր հասարակությանն այս իրավիճակից հանողը, աղքատությունը հաղթահարողը Սամվել Կարապետյանն է։ Մենք չենք կարող այլ վարչապետի թեկնածու ունենալ, քան Սամվել Կարապետյանը, և մեր հասարակության նշանակալի հատվածը դրան կողմնակից է»,- ընդգծել է նա։
Կարապետյանի խոսքով՝ մինչև Սահմանադրության 148-րդ հոդվածում փոփոխությունների կատարումը, որոնք թույլ կտան Սամվել Կարապենյանին դառնալ վարչապետ, կլինի ժամանակավոր համակարգող, որը կհամակարգի Սահմանադրության փոփոխության գործընթացը։ Համակարգողը կլինի կուսակցության ընտրական ցուցակի առաջին համարը։ Նարեկ Կարապետյանը շեշտել է, որ սահմանադրական իրավունքի մասնագետները հաստատել են առաջարկվող տարբերակի համապատասխանությունը Սահմանադրությանը։
Նա նաև հակադրել է կուսակցության կողմից առաջարկվող սահմանադրության փոփոխությունն իշխանությունների կողմից Ադրբեջանի պահանջով ամբողջ Սահմանադրության հնարավոր փոփոխության հետ։
«Ի տարբերություն այսօրվա իշխանության, ով ուզում է մեր ամբողջ Սահմանադրությունը փոխել Ալիևի (Ադրբեջանի նախագահ Իլհամ-խմբ․) և իր ընկերների առաջարկով և պահանջով, մենք դրանից խուսափելու համար ուղղակի տեխնիկական մեկ կետի փոփոխության արդյունքում հնարավորություն ենք տալիս սփյուռքի ամբողջ պոտենցիալին մասնակցելու Հայաստանի կառուցման գործին»,- ասել է նա։
Բացատրելով Սամվել Կարապետյանի առաջադրման պատճառները՝ նա նշել է, որ «Տաշիր» ընկերությունների խմբի նախագահը միշտ պաշտպանել է ձեռնարկատերերի կողմից ազգային տնտեսությունների զարգացմանը ներգրավվելու տեսլականը։
«Բայց ժամանակի ընթացքում առերեսվեցինք այնպիսի երևույթի հետ, որ տասնամյակներ մեր երկրի իրական խնդիրները չեն լուծվում, տասնամյակներ։ Վերջին ութ տարվա ընթացքում բոլոր տեսակի խնդիրներին առերեսվեցինք ու չունեցանք որևէ որակական լուծում։ Տարածաշրջանի երկրները մեծ քայլերով առաջ են գնում, մեր երկիրը մնում է հետընթացի մեջ, ուղղակի պետական պարտքի հաշվին պահում է իր տնտեսությունը։ Մեր առաջարկը նոր մոդելի պետության ձևավորումն է, ավելի ակտիվ, աշխարհի համար տնտեսապես ավելի բաց և ավելի տնտեսական զարգացմանը միտված»,- ընդգծել է նա։
Պատասխանելով հարցին, թե արդյոք կուսակցությունը քննարկե՞լ է նախկին վարչապետ Կարեն Կարապետյանի թեկնածությունը, «Ուժեղ Հայաստան» քաղխորհրդի անդամը նշել է, որ քննարկվել են տարբեր սցենարներ, սակայն պարզաբանել է, որ նախկին վարչապետին առաջադրվելու առաջարկ կուսակցությունը չի արել։
Նա ընդգծել է, որ Սամվել Կարապետյանն է այն մարդը, ով կարող է լուծել Հայաստանի առջև ծառացած խնդիրները։ Մեկնաբանելով Սամվել Կարապետյանի՝ Ռուսաստանի քաղաքացիությունից հրաժարվելու ժամկետները՝ նա հիշեցրել է տնային կալանքի հետ կապված սահմանափակումները։ Կուսակցության խորհրդի անդամը պատասխանել է, թե արդյոք քաղաքացիությունից հրաժարվելու հարցը կլուծվի՞ Կարապետյանի կալանքից ազատվելուց հետո։
«Միայն Հայաստանի քաղաքացիություն ունենալը Սամվել Կարապետյանի որոշումն է։ Այն ժամանակ, երբ որ պրոցեսները կհանգեն վարչապետության, նա լինելու է միայն Հայաստանի քաղաքացի»,- հայտարարել է նա։
Նարեկ Կարապետյանը նաև մեկնաբանել է ընտրություններից հետո, այսպես կոչված, «Գյումրի-2» սցենարի իրականացման հնարավորությունը, որը նախատեսում է մի քանի ընդդիմադիր ուժի համագործակցություն վարչապետի ընտրության գործում։ Պատասխանելով «Ուժեղ Հայաստան»-ի, նախկին նախագահ Ռոբերտ Քոչարյանի ու գործարար Գագիկ Ծառուկյանի քաղաքական ուժերի միջև կոալիցիա կազմելու հնարավորության մասին հարցին՝ Կարապետյանը նշել է, որ Հայաստանի համար առաջնային խնդիրը գործող առաջնորդին փոխարինելն է, և կուսակցության քայլերն «ամբողջությամբ ուղղված են հասարակության աջակցությունն ստանալուն»։
Նա պարզաբանել է, որ խոսքը խորհրդարանում մեծամասնություն ստանալու մասին է՝ նաև բացատրելով, որ կուսակցության նախընտրական ծրագրերն իրականացնելու համար անհրաժեշտ է բարձր մակարդակի կենտրոնացում։ Կարապետյանն «Ուժեղ Հայաստան»-ի՝ Քոչարյանին իշխանության բերելու ցանկության մասին իշխանական պաշտոնյաների հայտարարությունները պայմանավորել է իշխանությունների կողմից քաղաքական ասպարեզ նոր առաջնորդների մուտք թույլ չտալու և դրա ներսում համակարգային փոփոխությունները խոչընդոտելու ցանկությամբ։
«Ով հասկանում է Սամվել Կարապետյանի մասշտաբները, նա կհասկանա, որ այս ծանրության տակ մտնելով՝ նա մինչև վերջ գնալու է»,- հայտարարել է Կարապետյանը։
Նա դրական է պատասխանել հաջորդ հարցին, թե արդյոք կբացառի՞ կուսակցության կողմից Քոչարյանի օգտին քվեարկելը, եթե ձևավորվի կոալիցիոն կառավարություն։
Փետրվարի 10-ին կուսակցության նախագահ էր ընտրվել «Տաշիր» ընկերությունների խմբի նախագահ, գործարար Սամվել Կարապետյանը։ Կուսակցության համագումարում որոշում էր կայացվել վարչապետի թեկնածու առաջադրել Սամվել Կարապետյանին։ Փետրվարի 15-ին հայտնի էր դարձել, որ կուսակցության ցուցակն ընտրություններում կգլխավորի Կարապետյանի եղբորորդին՝ շարժման համակարգողը՝ որպես «անցումային համակարգող»։
«Տաշիր Արենայում» փետրվարի 25-ին տեղի կունենա երիտասարդների հանդիպումն «Ուժեղ Հայաստան» կուսակցության ցուցակը գլխավորողի հետ: «Ուժեղ Հայաստան» կուսակցությունը հիմնադրվել է 2025 թվականի դեկտեմբերի 8-ին։
