The Guardian-ում հեղինակած իր հոդվածում գերմանացի հայտնի ֆուտբոլիստ Ֆիլիպ Լամը նկատում է, որ Մադրիդի «Ռեալը» հայտնվել է իր համար անսովոր իրավիճակում. Չեմպիոնների լիգայի 15-ակի հաղթողը երկրորդ տարին անընդմեջ ստիպված է պայքարել փլեյ-օֆֆ փուլում։
Ըստ հեղինակի՝ ակումբի հաջողության գաղտնիքը միշտ եղել է այնպիսի մարզիչների ձեռքում, ինչպիսիք են Անչելոտին կամ Զիդանը, ովքեր իրենց խաղային անցյալի և հեղինակության շնորհիվ կարողացել են կառավարել աստղային հանդերձարանը։ Սակայն Խաբի Ալոնսոյի փորձը Մադրիդում ցույց տվեց, որ նույնիսկ ամենատաղանդավոր մարզիչը կարող է ձախողվել, եթե նրա համակարգված գաղափարները բախվում են ակումբի ներքին ազատությանը։
«Պերեսը «Ռեալ Մադրիդի» մարզիչներին համարում է փոխարինելի, ինչը այս պաշտոնը դարձնում է համաշխարհային ֆուտբոլում ամենադժվարը։ Գալակտիկոսների հետ թիմային աշխատանք զարգացնելը սխրանք է։ Այն, ինչ «Լևերկուզենի» խաղացողները կլանում էին, «Մադրիդի» խաղացողները ընկալում են որպես իրենց անհատականության և ազատության սահմանափակում»,- գրում է Լամը։
Մադրիդի «Ռեալը» սովորական ակումբ չէ, այն «ֆուտբոլիստների ակումբ» է, որտեղ նախագահ Ֆլորենտինո Պերեսը մարզիչներին համարում է փոխարինելի օղակներ, իսկ աստղերին՝ անձեռնմխելի։
Այսօր ակումբը կանգնած է վերակազմավորման լուրջ խնդրի առաջ։ Ռամոսի, Կրոսի և Մոդրիչի դարաշրջանի ավարտից հետո թիմում խախտվել է հավասարակշռությունը։ Պերեսի առջև ծառացած մարտահրավերը միայն նոր աստղեր գնելը չէ, այլ այնպիսի կազմ ձևավորելը, որը կկարողանա ստեղծել նոր ներքին հիերարխիա։ Առանց համապատասխան մարզչի և պաշտպանական ու կիսապաշտպանական ամուր օղակների՝ «Ռեալին» դժվար կլինի վերադարձնել իր երբեմնի գերիշխանությունը Եվրոպայում։