16 փետրվարի 2026 – 15:41 AMT
PanARMENIAN.Net – «Խաղաղության կամուրջ» նախաձեռնության անդամ Նարեկ Մինասյանը, անդրադառնալով Հայաստանում կայացած հայ և ադրբեջանցի քաղաքացիական հասարակության ներկայացուցիչների քննարկումներին, ասել է, որ Հայաստանի օկուպացված տարածքների թեման բարձրաձայնվել է։
«Կա երկկողմ փոխըմբռնում, որ խնդիրը պետք է կարգավորվի սահմանազատման գործընթացի համատեքստում: Ասեմ ավելին, առաջիկայում նախատեսվում է նաև երկու երկրների սահմանազատման հանձնաժողովների հանդիպում»,-ասել է նա, հայտնում է 1lurer.am-ը:
Ըստ նրա, հաշվի առնելով, որ նախորդն Ադրբեջանի տարածքում էր տեղի ունեցել, ամենայն հավանականությամբ, այս անգամ Հայաստանի տարածքում տեղի կունենա:
Փետրվարի 13–14-ին «Խաղաղության կամուրջ» նախաձեռնության շրջանակում Հայաստանում անցկացվել է երկկողմ կլոր սեղան, որի ընթացքում հանդիպել են Հայաստանի և Ադրբեջանի քաղաքացիական հասարակությունների ներկայացուցիչները։ Ադրբեջանական պատվիրակությունը Հայաստան է ժամանել ցամաքային սահմանի արդեն սահմանազատված և սահմանագծված հատվածով՝ անցնելով սահմանված բոլոր ընթացակարգերը։