ԱՄՆ զինված ուժերը պատրաստվում են Իրանի դեմ երկարատև գործողություններ իրականացնելու հնարավորությանը, որոնք կարող են տևել մի քանի շաբաթ, հայտնում է Reuters-ը՝ հղում անելով երկու անանուն ամերիկացի պաշտոնյաների:
Նրանց խոսքով՝ ծրագիրը նախատեսում է ավելի բարդ գործողություն, քան 2025 թվականին իրականացվածը: Երկարատև արշավի ընթացքում ԱՄՆ ուժերը կարող են հարվածել Իրանի կառավարությանը և անվտանգության օբյեկտներին, այլ ոչ թե միայն միջուկային ենթակառուցվածքներին, ասել է աղբյուրը:
Մասնագետներին հղում անելով՝ գործակալությունը նշում է, որ Իրանի դեմ նման գործողության դեպքում ԱՄՆ ուժերի համար ռիսկերը շատ ավելի բարձր կլինեն, և Իրանի հնարավոր պատասխան հարվածները նույնպես կբարձրացնեն տարածաշրջանային հակամարտության ռիսկը:
Ավելի վաղ ԱՄՆ նախագահ Դոնալդ Թրամփը հայտարարել էր Մերձավոր Արևելք երկրորդ ամերիկյան ավիակիր ուղարկելու մտադրության մասին՝ Իրանի վրա ճնշման աճի ֆոնին:
