Դատարանը մերժել է քննարկել Վահագն Չախալյանին գրավի դիմաց ազատ արձակելու միջնորդությունը: Դատավոր Կարեն Ֆարխոյանը որոշումը կայացրել է արքեպիսկոպոս Բագրատ Գալստանյանի և մյուսների գործով դատական նիստում:
Հիշեցնենք, որ Չախալյանի ընտանիքում կա երեք երեխա, որոնցից երկուսն անչափահաս են։ Ընտանիքի հայրը միակ աշխատողն է և շարունակվող կալանքը լուրջ ֆինանսական վնաս է հասցնում ընտանիքին։ Այս մասին խոսել է փաստաբանը, ինչպես նաև այն մասին, որ գրեթե բոլոր մյուս մեղադրյալների խափանման միջոցները փոփոխվել են։
Սակայն դատավորը հայտարարել է, որ Չախալյանի կալանքի ժամկետն ավարտվում է մարտի 4-ին, փաստաբանը նոր հանգամանքներ չի ներկայացրել և միջնորդությունը չի քննարկել։ Դատավորը հավելել է, որ կալանքի տակ գտնվողների հարցը կքննարկվի հաջորդ նիստին։ Նա նույնիսկ խոստացել է դռնփակ նիստ անցկացնել, եթե Չախալյանը մտադիր է ընտանեկան բնույթի տեղեկություններ հրապարակել։