Չնայած իշխանությունների կողմից գործադրվող ճնշումներին՝ խափանելու Հայաստանի սահմաններից դուրս նախատեսված Եպիսկոպոսաց ժողովը, այնուամենայնիվ, ըստ վերջին տեղեկությունների, այն կկայանա։ Նախապես ընտրված վայրի վերաբերյալ որոշումն էլ մնում է անփոփոխ։ AlphaNews-ի հետ զրույցում աստվածաբան Նիկողոս Հովհաննիսյանը նշել է, որ տեղի ունեցողը վկայում է՝ Հայ Առաքելական եկեղեցին չի ընկրկում իշխանությունների ճնշումների առաջ։ «Եկեղեցին դարեր շարունակ մեր ազգային կյանքում ունեցել է լուրջ և կարևոր դերակատարություն, և որևէ թագավորություն կամ իշխանություն չի կարող եկեղեցուն պարտադրել որևէ բան»,- ասել է Հովհաննիսյանը։
Նրա խոսքով՝ այսօր Հայաստանում նկատվող գործընթացները սովորական ճնշումներ են եկեղեցու նկատմամբ։ Ըստ աստվածաբանի՝ փորձ է արվում եկեղեցին դարձնել «խամաճիկ կառույց», բայց դա անհնար է։
«Եկեղեցին երբևէ չի կարող դառնալ որևէ իշխանության ձեռքի գործիք»,- ընդգծել է նա։ Հովհաննիսյանի գնահատմամբ՝ Մայր Աթոռում տեղի ունեցող գործընթացները բացառապես եկեղեցու ներքին գործն են։ Նրա խոսքով՝ միայն Մայր Աթոռն ու եկեղեցին կարող են որոշել, թե որտեղ և երբ պետք է անցկացվի ժողովը, և որևէ արտաքին ուժ չի կարող փոխել այդ որոշումները։ «Այն, ինչ որոշվել է, դա էլ կլինի»,- եզրափակել է աստվածաբանը։