ՀՀ պաշտպանության նախարար Սուրեն Պապիկյանը խոսել է սահմանին կառուցված զինված ուժերի ամրացված շրջանների մասին:
Բարձր լեռնային տարածքում գտնվող ամրացված տարածքներից մեկում նկարահանված տեսանյութում Պապիկյանը նշել է, որ ամրացված շրջանը «փակ, երկաթբետոնյա համակարգ է՝ ծածկված նաև հողային շերտով»:
Տարածքի ներքին ցանցը թաքնված է ստորգետնյա տարածքում և, ըստ նախարարի, այն անզեն աչքով հնարավոր չէ դիտարկել: Կախված տեղանքից՝ ամրացված տարածքներն ունեն բազմակողմանի պաշտպանություն իրականացնելու հնարավորություն: Ըստ Պապիկյանի՝ ամրությունները պաշտպանված են անօդաչու թռչող սարքերից, և հնարավոր մարտի ժամանակ կարող են պաշտպանություն ապահովել զինծառայողների համար՝ թույլ տալով նրանց պաշտպանել սահմանն ավելի շահեկան դիրքերից:
Ամրացված տարածքները նախատեսված են տարբեր փոքր զենքերի միջոցով պաշտպանության համար, բայց դրանք կարող են տեղավորել նաև այլ տեսակի զենքեր և ռազմական տեխնիկա: Պաշտպանության նախարարը նշել է, որ նման ամրությունների կառուցումը նախատեսվում է ամբողջ սահմանի երկայնքով: Նրա խոսքով՝ վերջին տարիներին կառուցվել է մի քանի տասնյակ նման դիրք:
«Ես շատ-շատ կարևոր ձեռքբերում եմ համարում զինված ուժերի և մեր ինժեներական մտքի համար, որովհետև սա, առաջին հերթին, մեր զինվորներին պաշտպանվածության, բայց, միևնույն ժամանակ, հոգեբանական հսկայական առավելություն է տալիս նրանց»,- ասել է Պապիկյանը՝ հավելելով, որ նորակառույց դիրքերն զգալիորեն տարբերվում են անցյալի դիրքերից իրենց հնարավորություններով, ուժով և կառուցվածքով։
Պապիկյանը մեկ այլ տեսանյութում էլ ներկայացրել է պաշտպանական կառույցները ներսից: Նա ցուցադրել է նոր կառուցված ննջասենյակները, խոհանոցը, ճաշարանը, տեսադիտարկման համակարգերով հագեցած սենյակը:
«Թույլ է տալիս և՛ ամրացված շրջանի յուրաքանչյուր անկյունը դիտարկել, և՛ նաև միացված է ՀՀ պետական սահմանի պահպանությունն իրականացնող բոլոր հենակետերին», – նշել է նա:
Ամրացված շրջանում զինվորների համար հանգստի սենյակ էլ կա, ըստ նախարարի՝ կարող են այստեղ կարդալ, շախմատ խաղալ և այլն:
Պապիկյանը հունվարի 13-ին հայտնել էր, որ Պաշտպանության նախարարության կապիտալ ծախսերը 2025 թվականի համար կազմել են 57,7 միլիարդ դրամ։ Այս տարվա ծախսերը ներառում են ամրաշինությունների կառուցում, ինչպես նաև զորանոցների կառուցում ու վերանորոգում։
