29 հունվարի 2026 – 12:10 AMT
PanARMENIAN.Net – Հայաստանի ընդդիմադիր պատգամավորները հանդիպում են ունեցել ԵԽԽՎ Մոնիթորինգի հանձնաժողովում Հայաստանի պարտավորությունների հարցով համազեկուցողներ Բորիանա Աբերգի և Պիերո Ֆասսինոյի հետ։ Այդ մասին ֆեյսբուքյան եթերում հայտնել է ԱԺ «Պատիվ ունեմ» խմբակցության ղեկավար Հայկ Մամիջանյանը:
Նա նշել է, որ փաստական տվյալներ են ներկայացրել «քաղբանտարկյալների խայտառակ վիճակի վերաբերյալ»:
«Համազեկուցողներին կոչ ենք արել այցելել քաղբանտարկյալներին»,-ասել է նա:
Մամիջանյանն ասել է, որ անդրադարձ է եղել նաև եկեղեցու դեմ ուղղված արշավին։
«Մենք մեր դժգոհությունն ենք հայտնել զեկույցում տեղ գտած խայտառակ և տեղ չգտած ձևակերպումների մասին», – ասել է նա։
Հունվարի 26-ին ԵԽԽՎ-ն «Վեհաժողովի մոնիտորինգի ընթացակարգի առաջընթացը» վերնագրով բանաձևում մտահոգություն է հայտնել ՀՀ վարչապետ «Նիկոլ Փաշինյանի և ՀԱԵ առաջնորդի միջև լարվածությամբ»:
Բանաձևին Հայաստանին առնչվող հատվածում եկեղեցուն ևս մեկ անդրադարձ կա՝ ԵԽԽՎ-ն մտահոգություն է հայտնել «եկեղեցու մի քանի հոգևորականների կողմից իշխանությունը բռնազավթելու ծրագրերի մասին տեղեկությունների առնչությամբ»:
ԵԽԽՎ-ն մտահոգված է նաև ՀՀ-ում խորհրդարանական ընտրություններին ընդառաջ քաղաքական դաշտում ծայրահեղ բևեռացմամբ և կոչ է արել բարելավել քաղաքական մեծամասնության և ընդդիմության միջև հարաբերությունները՝ որպեսզի «ընտրարշավը զերծ մնա ընտրությունների մասնակիցների միջև անձնական հարձակումներից»: