Երևանի բոլոր մանկապարտեզներում կտեղադրվեն տեսահսկման սարքեր․ Ավինյան

ԵՐԵՎԱՆ, 26 հունվարի. /Նովոստի–Արմենիա/. Մանկապարտեզներում տեսահսկման համակարգերի տեղադրումը պետք է շարունակվի և ամբողջացվի ամբողջ Երևանով, հայտարարեց Երևանի քաղաքապետ Տիգրան Ավինյանն այսօր քաղաքապետարանի գործակարգավարական խորհրդակցության ժամանակ։

«Վստահորեն, սա մեր երեխաներին մատուցվող ծառայության որակի բարելավմանն է միտված», – նշեց Ավինյանն՝ ընդգծելով, որ տեսահսկման սարքերին հասանելիություն պետք է ունենան շատ սահմանափակ մարդիկ։

Քաղաքապետի խոսքով՝ այս որոշման արդյունքում հնարավորություն է ստեղծվում հսկել, զգոն լինել և նույնիսկ կանխարգելել մանկապարտեզներում եղած վատ երևույթները։ 

«Երեխաների նկատմամբ ոչ պատշաճ վերաբերմունքի դրսևորումները, կարելի է ասել, գրեթե բացառում ենք այս մեխանիզմներով», – ասաց Ավինյանը։ 

Քաղաքապետարանի հանրակրթության վարչության պետը հայտնեց, որ ներկայումս տեսահսկման համակարգեր են տեղադրված Երևանի 42 մանկապարտեզներում (շուրջ 1700 տեսախցիկ), որոնք սպասարկում են 353 խումբ, և իրականացվում է ամենօրյա վերահսկողական կենտրոնացված դիտարկում։