Բարձր կալորիականությամբ, դժվարամարս սննդից հետո օրգանիզմը բեռնաթափման կարիք ունի, և այստեղ է, որ օգնության է հասնում կաթնամթերքը․ ՎԻԴԵՈ
ԵՐԵՎԱՆ, 22 հունվար․/Նովոստի-Արմենիա/. Բարձր կալորիականությամբ, դժվարամարս սննդից հետո օրգանիզմը բեռնաթափման կարիք ունի, և այստեղ է, որ օգնության են հասնում կաթնաթթվային մթերքները:
«Նովոստի-Արմենիա»-ի NewsArmenia Stories Youtube-յան ալիքով հեռարձակված հարցազրույցի շրջանակում սննդաբան Մարինե Գևորգյանն անդրադարձել է կաթնաթթվային մթերքների, մասնավորապես կեֆիրի, հունական յոգուրտի, օգտակարությանն ու առողջարար ուժին։
Գևորգյանի խոսքով՝ օրգանիզմի բեռնաթափման համար նախ պետք է սահմանափակել արդեն չարաշահված մթերքները՝ քաղցրը, ճարպոտ, տապակած մթերքները, ալկոհոլը, ինչպես նաև կանոնավորել քունն ու սննդակարքում ավելացնել կեֆիր։
«Գաղտնիք չէ, որ կեֆիրը շատ հարուստ է ոչ միայն պրոբիոտիկներով, այլև մագնեզիումով, կալցիումի, ֆոսֆորի լավ աղբյուր է։ Շատ է պարունակում ճարպալույծ վիտամիններ, որոնցից են D, K վիտամինները։ Շատ ավելի կարևոր է, որ այն պարունակում է նաև B խմբի վիտամիններ, որոնք շատ կարևոր են նյարդային համակարգի համար»,- նշում է սննդաբանը։
Գևորգյանի խոսքով՝ կեֆիրը պարունակում է ավելի քիչ լակտոզա, և լակտոզայի նկատմամբ անտանելիություն կամ ալերգիա ունեցողները կարող են բեռնաթափման ծրագրի ժամանակ օգտագործել այն։
Ըստ սննդաբանի, իմունիտետի ճիշտ ձևավորման համար անհրաժեշտ է ճիշտ քանակի սպիտակուցային մթերք։
«Հունական յոգուրտը պարունակում է սպիտակուցներ, լակտոզայի չափը մինիմալիզացված է։ Կարելի է հանգիստ օգտագործել՝ բարձրացնելով իմունիտետը, ինչպես նաև կարգավորել քաշը», – նշումը Գևորգյանը։
Ըստ սննդաբանի՝ անհրաժեշտ է ընտրել միայն բնական ծագման, բացառապես անարատ կաթից ստացված մթերքներ, քանի որ կան մի շարք մակնշումներ, որոնք արդեն խոսում են բնական ծագման չլինելու մասին։
Մանրամասները՝ տեսանյութում։